A proliferación de eventos e festexos incrementou a demanda de traxes de festa
02 jul 2022 . Actualizado ás 05:00 h.Aínda que tradicionalmente onte sería o primeiro día das rebaixas de verán, en Lalín a maioría dos establecementos xa teñen os carteis colgados desde o día 23 en diante. En moitas tendas, a Noite Branca que se celebrou o día 17 na capital dezana, xa abriu a espita á aplicación dalgúns descontos. Non pasou o mesma noutras localidades da zona. Na Estrada, desde a Acoe sinalaban onte que os comerciantes están a acudir aínda a recoller os carteis de rebaixas á agrupación e, apuntan, hai quen non empezará con elas ata a semana que vén. Outros arrincaron xa esta semana, en xeral, a partir do martes despois de que acabaron as festas de San Paio.
En Silleda, a presidenta da asociación de comerciantes, Ecos, Estefanía Fernández, explicaba onte que «algúns comercios empezaron xa esta semana» e outros o fixeron onte mantendo o calendario tradicional.
Desde Ecos destacan a campaña impulsada polo Concello de Silleda para promover o uso do galego repartindo carteis de rebaixas. Unha iniciativa que está a ser tendo moi boa acollida e que agardan que axude a impulsar as rebaixas.
En Lalín, os comercios adiantaron as rebaixas seguindo o exemplo de marcas e cadeas. Nalgúns casos para pór ás pezas os mesmos prezos que xa tiñan rebaixados nas páxinas web de cada marca ou nas tendas propias das mesmas e evitar que os clientes se atopasen con diferenzas de prezos.
Os comerciantes da zona coinciden en que as rebaixas arrincaron con timidez e «lentamente». Achácano en gran parte ao mal tempo destas últimas semanas. A choiva e o frío non invitaban a comprar roupa estival e nin as sisas nin as sandalias, por pór dous exemplos, tiveron apenas saída eses días nos que as temperaturas eran máis semellantes ás de outono que ás dun verán incipiente. Meritxell Silva, do CCA da AED, explica que «a campaña de verán non foi mala e a xente estaba agardando polas rebaixas pero o mal tempo influíu moito, agora esperemos que co calor se animen».
Malos agoiros económicos
O sol de onte e a subida dos termómetros animou a rúa e os comerciantes agardan que a chegada da calor impulse as vendas. Agardan que «con todo o que nos están contando a diario da inflación e da situación económica a xente non deixe de mercar» e que o consumo non se retraiga de golpe. Precisamente eses auspicios nada halagüeños para a economía fai ser cautos aos comerciantes que nestes momentos están a facer os pedidos de mercancía para a tempada de outono-inverno. Algún non se atreve a comprar con alegría por se logo non vende e queda coas pezas nos percheros. Nos escaparates de Lalín os descontos onte oscilaban entre un 30 e un 50 %, na maior parte dos establecementos. Hai que ten un 20 % pero son os menos e establecementos nos que os descontos non acadan a toda a mercancía.
Demanda de costureiras
A proliferación de eventos fixo que crecese a venda de roupa de festa recuperando niveis de antes da pandemia. Nas tendas explican que se buscan modelos coquetos que se poidan lucir en máis dunha ocasión e os máis postos quedan reservados ás vodas nos casos dos familiares máis próximos aos contraentes. Para o resto dos eventos búscase roupa bonita pero máis ponible e, se é posible, alcanzable. Nalgunhas tendas de Lalín comentaban que acabaron esgotando este tipo de mercancía, repondo, e nalgún caso, solicitando un adianto das coleccións de outono. Os comerciantes quéixanse de que se compra con moi pouca antelación, en moitos casos dous días antes da celebración. Esas présas unidas ao enorme aumento de eventos ten saturadas ás costureiras que non dan abasto a levar a cabo moitos arranxos con moi pouca marxe. A volta do sol fixo tamén que houbese clientes que pediron adiantar a entrega de traxes de comuñón para poder realizar estes días as reportaxes fotográficas.
Un tesouro cheo de premios de Ecos en Silleda
A asociación de comerciantes de Silleda puxo en marcha desde o xoves ao día 31 o concurso O Tesouro de Trasdeza. Para participar é necesario recoller o mapa do tesouro en calquera establecemento Ecos, completar 10 casas con selos cun máximo de dous por comercio, cubrir os datos e depositar a cartilla nas urnas situadas nos establecementos locais.
As tres presentas máis rápidas obterán un vale Ecos de 100 euros a gastar no comercio local. O resto das cartillas completadas entrarán nun sorteo de premios que se celebra o 3 de agosto, moitos cedidos por socios. Entre estes inclúense sesións de fotos nun estudo fotográfico, packs de produtos de beleza, complementos de moda, mantas, xogos de toallas, de coxíns, plantas, reloxos, xoias, caixas de botellas, doces, melindres de Silleda, lotes de produtos Eco, lotes de libros, chuletones de vaca, empanadas, vales de descontos dun 10 % e dun 20 % e cheques directos de 10 e 20 euros para gastar no comercio local.
Pódese obter un selo por unha compra superior a 10 euros e gañar un máis extra por realizar unha proba divertida que os participantes atoparán escaneando os códigos QR escondidos nos establecementos. A campaña ten pensado como unha divertida procura do tesouro cunha dinámica a modo de yincana.
A esta campaña engádese a de Trasdeza sen plástico que segue vixente e prolongarase no tempo. A agrupación ten nestes momentos pendente a entrega de varios diplomas. Ao mesmo tempo prosegue, ata o día 8, o concurso de tapas TapEcos e a campaña do Comercio Galego Días Azuis da Xunta que conta coa participación de moitos establecementos silledenses.