A falta de subministración para a alimentación animal empeza a ser crítica
18 mar 2022 . Actualizado á 05:00 h.Pablo Meijomín, presidente da ADSL de Porcino de Silleda, explicaba onte que «temos 350 explotacións, das cales a metade teñen penso para hoxe (por ayer)». Ao mediodía se lles acababa o penso en moitas granxas da zona e desde a fábrica de pensos a resposta que lles dan é que non teñen produto, porque non lles deixan ir cargalo ao porto, neste caso ao de Marín, que é onde se abastecen de cereal as fábricas dezanas, como Nucamsa ou Nudesa.
Explica Meijomín que «os poucos camións que ían ao porto van escoltados, ameazados, están pinchando rodas e non se están respectando os servizos mínimos». Destaca que «nunca pasou isto porque en anteriores folgas do transporte sempre se respectou a alimentación animal e os servizos mínimos porque é algo moi básico. Non é o mesmo que se perda un camión de froita ou doutra cousa, que ao final son cartos, pero ver como morren os animais de fame ou como se comen uns aos outros é unha verdadeira barbaridade». Cre que «isto é xa unha cuestión de humanidade e de sensibilidade». Das 350 explotacións integradas en laADS de Silleda, 50 granxas son de nais cunhas 15.000 porcas e o resto son de cebo que suman, di, unhas 400.000 prazas destes animais.
Calcula que «agora mesmo pode haber xa uns 10.000 porcos sen penso directamente e si non lles chega o penso hoxe (por ayer) empezaranse a morder uns aos outros». No caso dos porcos, Meijomín pon o acento no canibalismo destes animais que non aguantan sen comer máis de 24 horas e a partir de aí empezan a morderse e a comerse uns a outros. Unha situación dramática que ven xa próxima se non se soluciona a falta de alimento. Na súa explotación, Pablo Meijomín, ten 1.400 nais e uns 20.000 porcos de cebo.
A medida que pasa o tempo a situación é cada vez máis perentoria para as granxas e os gandeiros reclaman poder dar para comer aos animais. Que estes acaben no matadoiro e teñan que ser sacrificados tampouco sería unha opción xa que o parón do transporte impide tamén o funcionamento dos matadoiros que están ao ralentí.
No sector avícola, granxeiros da zona apuntaban que ían resistindo pero temen o que ocorrerá se esta situación prolóngase uns días máis. En Rodeiro, apuntaban que xa van tres días que non se recollen os pitos para matar, que seguen nas granxas comendo.
En moitas explotacións, estase racionando o alimento para intentar estirar todo o posible as existencias.
Preocupación no sector cunícola por desabastecemento
O sector cunícola tampouco é alleo aos problemas. Cogal avisou ás súas granxas da posibilidade de folga para que fixesen provisión. María Antonia Ramos Almansa, presidenta da Asociación de Produtores de Coellos de Galicia (Progacun) e dona dunha explotación en Rodeiro, sinalaba onte que xa sabía dalgúns produtores con problemas pola falta de penso. Outra dificultade ao que se enfrontan é que, explicaba, «á xente non lle saquen os coellos». Apunta que «no noso sector se levan uns coellos para o matadoiro, límpanse as gaiolas e nese espazo ponse ás nais para que paran. Se non levan os coellos a cadea se para e as explotacións non teñen sitio para as nais, porque seguen tendo aos coellos que terían que irse xa para o matadoiro». Ramos sinala que «o problema vai ser se esta situación prolóngase», queixándose de que no sector cunícola «en Galicia non temos ningunha axuda da PAC e si noutras comunidades como en Valencia».
Camións dos supermercados parados nos piquetes que non chegan a destino
Mentres tanto, nos supermercados os mostradores do peixe continúan baleiros e explican que non está a chegar mercancía. Onte Gadisa tiña a tres camións parados e bloqueados na rotonda do cruzamento da Nacional 640 e a Rolda Este con mercancía para os establecementos da firma en Lalín.
Nos andeis os ocos chegan xa a ningúns outros produtos frescos como os dalgunhas froitas, verduras e hortalizas. Xa en venres e ás portas do sábado, os días nos que os veciños adoitan facer a compra da semana, crese que a situación se pode agudizar e a falta de entrada de mercancía vai deixar máis andeis baleiros nos lineais dos supermercados. O panorama repítese para a maioría das cadeas alimentarias, con problemas de distribución.