Desestima un recurso interposto pola Asociación Provincial de Empresarios de Estacións de Servizos contra o Concello de Rodeiro e a cooperativa
14 ene 2020 . Actualizado ás 05:00 h.O Xulgado do Contencioso Administrativo número 2 de Pontevedra desestimou o recurso presentado pola Asociación Provincial de Empresarios de Estacións de Servizos de Pontevedra contra a desestimación por silencio administrativo do recurso de reposición interposto contra o acordo do Concello de Rodeiro de 22 de novembro do 2016. Nel dábase licenza á cooperativa do Rodo para construír unha nave e a instalación dunha estación de servizo. A asociación demandaba tamén á cooperativa e consideraba que se incorreu en infraccións urbanísticas.
O xulgado desestima unha por unha as cuestións expostas pola agrupación de empresarios de estacións de servizo e ratifica a legalidade da gasolineira do Rodo e as obras efectuadas. A maxistrada, nunha sentenza de 42 folios, argumenta de forma detallada punto por punto as razóns das desestimacións de cada alegación. Considera que «non queda acreditada a existencia dunha parcelación legal en chan rústico coa realización das obras licenciadas, xa que ademais non existiu como tal un acto de parcelación nin segregación en sentido xurídico». E que «tampouco pode considerarse que teña habido unha parcelación de facto polo feito de que se autorizaron dous usos distintos na mesma parcela (almacén de maquinaria e estación de servizos), sen que conste norma algunha que o impida» e avalada polos informes achegados polo Concello de Rodeiro «como o da Deputación provincial de 15 de novembro de 2013, ou por informes favorables e autorizacións que foron emitidos por distintos organismos».
A maxistrada entende que «a posibilidade de distintos usos nunha mesma parcela vén avalada pola mesma posibilidade de que na mesma poidan coexistir réximes de chan distintos, por estar, por exemplo, unha parte clasificada en rústico común e outro en rústico de protección, ou rústico». Neste caso, explícase no fallo «consta informe favorable á nave e instalación pretendida emitido polo Servizo de Montes da Consellería de Medio Ambiente, así como autorización da Axencia Galega de Infraestruturas, ao tratarse de parcela clasificada como chan rústico de protección forestal e de protección de infraestruturas polo PXOM».
A agrupación provincial alegaba na súa demanda posibles incumprimentos de parámetros de edificabilidade da parcela que foron desestimados considerando a existencia de tres parcelas e non unha única. Tamén foi desestimada pola maxistrada a alegada dunha suposta apertura ilegal dun camiño. A este respecto apúntase na sentenza que «como consta na documental achegada polo Concello de Rodeiro, e como resulta das declaracións oídas en xuízo, trátase dun proxecto distinto, alleo ás obras de almacén e estación de servizo, e que foi aprobado en acordo independente por parte da xunta de goberno local».
Desestima ao mesmo tempo a pretensión de recuperar un camiño público ocupado, explicando que, «non se acredita tal ocupación» e con ela desestímase a alegación da demandante de fundar a solicitude de nulidade do acordo do Concello de Rodeiro nunha suposta infracción urbanística moi grave por acender que se concedeu a licenza sobre unha parcela que incorporaba terreo de dominio público.
No fallo, contra o que cabe un recurso de apelación ante o Tribunal de Xustiza de Galicia, a maxistrada apunta ademais a existencia de autorizacións e obras realizadas para subministracións, os informes favorables e autorizacións sectoriais de diferentes organismos. A estación de servizo do Rodo abriuse o 15 de agosto do 2018, co que leva ano e medio de funcionamento.
O presidente da cooperativa do Rodo, José Luis Camiñas, expresaba onte a súa satisfacción polo fallo xudicial que dá a razón a Concello e cooperativa na realización das actuacións relativas á obra e posta en marcha da gasolineira.