Rugby O equipo afronta a pretemporada máis complicada coa necesidade de sumar un mínimo de tres xogadoras para competir
16 ago 2018 . Actualizado ás 05:00 h.Doce mulleres sobre o campo e a necesidade imperiosa de incorporar un mínimo de tres novas xogadoras para poder competir, aínda que con esa cantidade será complicado. Nesta tesitura atópase o equipo de rugby feminino Coreti Lalín tras contabilizar seis baixas con relación á tempada pasada. Por iso buscan novos efectivos á desesperada e invitan a outras potenciais xogadoras a probar sorte. Ata o momento, exercítanse xunto ao conxunto masculino ás ordes de Javier Martínez, en vista de poder rearmarse e, despois, buscar un adestrador.
No futuro máis próximo podería producirse a desaparición do equipo, pero a capitá da pasada tempada, Paula García, como o resto do persoal, nin se expón esa opción. Aínda teñen tempo de reacción e loitarán ata o final.
«Necesitamos mínimo 17 xogadoras, pero se somos 15 xogamos», dicía a xogadora nunha pretemporada na que contan con Bea Ledo, Laura Bértolo, Coral, Eva, Katy, Laura Rozas, Lucía, Marta, Patricia, Susana, Tania e ela mesma. Tamén agardan a recuperación de Yani e Nuria, pero están lesionadas de longa duración. As baixas deste ano débense a razóns persoais, dúas delas por embarazo.
Situación aínda salvable
A situación aínda é salvable e as xogadoras están a traballar para iso. «Non sei de onde imos sacar á xente, pero temos ganas e queremos facer equipo», indicaba García. Esta tónica, ao comezo do curso, é habitual aínda que admite que «sempre estamos así, pero este ano é o peor». As preinscricións no club finalizan o próximo día 20, pero a imposibilidade de acadar a meta nesa data é unha realidade e seguirán esixíndose ata dar coa solución aos seus problemas ata mediados de setembro, cando haberán de tomar a decisión final. A directriz é clara, non baixar os brazos.
Non hai requisitos para probar sobre o céspede lalinense os martes e xoves ás 21.00 horas e os venres ás 21.30. «Serve calquera persoa. Hai posicións máis rápidas, outras con máis forza. Agora empezamos co físico, así que ninguén tería problema», incitaba Paula García a todas as mulleres para acudir a esta chamada desesperada.