As saídas de vía sucédense na estrada que une Ourense e Pontevedra sen que se albisque solución
02 novs 2023 . Actualizado ás 05:00 h.A ecuación non falla. En canto a choiva aumenta, os accidentes continúan sucedéndose na estrada N-541, o viario que se fixo tristemente coñecido por ser o que protagonizou o accidente do autobús que se caeu ao río Lérez en Noiteboa, no que faleceron sete persoas. A última fin de semana, cun tempo de cans, repetiuse a mesma situación que noutras xornadas chuviosas. Cóntao Javier Lois Abal, concelleiro do goberno de Cerdedo-Cotobade e tamén encargado de Protección Civil: «O sábado e o domingo alá foron outros dous coches, en menos de 24 horas tivemos que ir a dous accidentes», indicaba. E o mesmo transmitía o alcalde, Jorge Cubela, a través das redes sociais, onde escribiu: «En menos de 24 horas, a N-541 soportou dúas novas saídas de vía distintas, en puntos de concentración de accidentes. Ide con coidado, amigos». A súa denuncia enmárcase na campaña que se está levando a cabo para reivindicar o arranxo integral desta arteria viaria.
Lois Abal leva estatísticas de todos os accidentes que se producen nas vías do municipio, xa que o 112 dálles aviso cada vez que se produce un contratempo. Só nos oito primeiros meses do 2023 contabilizou 33 sinistros na estrada N-541 ao seu paso por Cerdedo-Cotobade. Para coñecer a siniestrabilidad real deste trazado habería que saber o que sucede en todos os concellos polos que pasa, desde Ourense ata a capital pontevedresa, xa que os 33 sinistros citados son só nun pequeno tramo. Lois Abal explica que, en canto chove, as saídas de vía sucédense e que o patrón se repite: «A maioría dos vehículos esvaran e saen da vía pola marxe dereita, en algúns casos en sitios onde hai dobre carril. Isto fai que moitos dos accidentes, afortunadamente, non sexan graves. Pero si temos moitos feridos leves e ás veces sinistros moi graves como o de Noiteboa ou como a posterior morte dun motorista no mes de xaneiro deste mesmo ano».
Tivo que saír polo portelo
Efectivamente, os dous accidentes que se produciron esta fin de semana, ambos en Folgoso, saldáronse sen danos persoais, pero si con cuantiosas desfeitas materiais e cun bo susto para os condutores. Un deles tivo que saír polo portelo ao quedar inutilizadas as portas tras o impacto sufrido.
A pé de viario, o único sitio onde actualmente se está actuando para evitar a alta sinistralidade da N-541, á que ano tras ano organismos como a RACE ou como Automobilistas Europeos Asociados sitúan entre as estradas perigosas de España, é na ponte no que en Noiteboa se caeu o autobús ao río Lérez, é dicir, no viaduto de Pedre. As obras comezaron hai algo máis dun mes, a finais do mes de setembro. Trátase dunha reparación urxente, na que o Ministerio de Transportes, Mobilidade e Axenda Urbana inviste máis dun millón de euros e que se agarda que estea rematada a finais de decembro, é dicir, coincidindo co aniversario da traxedia no Lérez.
Hai puntos negros ou os accidentes repártense de forma igualitaria por todo o viario? O certo é que se rexistran sinistros en numerosos lugares, sobre todo saídas de vía con consecuencias de chapa e pintura. Pero, en Cerdedo-Cotobade, os sitios onde máis condutores acaban saíndose da calzada son dúas: Pedre, o mesmo lugar do accidente do autocar, e Folgoso, xa na zona cercedense. A concorrencia de tantos accidentes fai que sexa bastante habitual circular pola N-541 e darse de bruzos na cuneta con cristais ou con algunha peza dun vehículo. Tamén, desafortunadamente, ao longo da estrada hai lugares onde se lembra aos falecidos no asfalto. Nun deles, moi preto da gasolineira de Cerdedo, hai sempre sentidos recordos cara a un novo motorista falecido.
O pacto dos alcaldes
Aínda que as estatísticas de accidentes neste viario veñen de lonxe, a raíz do suceso do autocar os alcaldes dos concellos que atravesa o viario dixeron xa abonda. Uníronse no denominado Pacto de Pedre (abandeirado polos municipios do Carballiño, Beariz, O Irixo, Maside, Boborás, Cerdedo-Cotobade e Punxín) e comezaron un labor para tratar de concienciar sobre o perigo da N-541 e a necesidade de que o Goberno central acometa unha reforma integral da mesma. Froito dos contactos que foron facendo cos responsables de distintas Administracións, como co alcalde de Pontevedra, Miguel Anxo Fernández Lores, ampliáronse as súas demandas e propostas. De feito, desempoouse a idea de buscar unha alternativa á N-541 e reclamar á Xunta e ao Estado que constrúan unha autovía desde Pontevedra ao Carballiño (desde aí xa hai unha vía en condicións cara a Ourense) cun ramal tamén cara a Lalín. A idea é levar a súa reivindicación a todos os foros posibles, entre eles o Parlamento de Galicia.
Todo iso coincide no tempo coa investigación polo accidente do autobús en Noiteboa. A ese respecto, o último que indicou a Garda Civil é que a velocidade á que transitaba o autobús era de 90 quilómetros por hora fronte aos 80 aos que está limitada e que non se adecuou o ritmo á meteoroloxía adversa.