A Estrada ensaiará a entrega de bonos en lugar de repartir comida a familias necesitadas
A ESTRADA
Esta experiencia piloto de seis meses prestarase a unha decena de beneficiarios para produtos de primeira necesidade
13 jul 2025 . Actualizado á 05:00 h.Na Estrada activouse no seu día, como noutros concellos da zona, a repartición de alimentos entre familias en risco de exclusión social como unha vía para colaborar na súa manutención e atender así situacións de primeira necesidade. Se comezou hai anos cun carácter excepcional mantense no tempo e agora o goberno local quere ensaiar outra fórmula para trasladar esa colaboración aos beneficiarios. Desde este mes o departamento municipal de Servizos Sociais porá en marcha unha experiencia piloto coa entrega de bonos ás familias usuarias desta prestación, para trocalos nun supermercado, en lugar de recibir de forma directa os produtos alimenticios.
A concelleira de Servizos Sociais, Amalia Goldar, remarcaba onte que o servizo de alimentos naceu de forma excepcional pero «moitas veces é un complemento importante para algunhas familias, así que se continuou mantendo no tempo e hoxe en día segue sendo necesario». As unidades familiares que requiren esta prestación reduciuse, xa que se antes roldaban a vintena, na actualidade achéganse á decena.
A decisión de optar por esta nova fórmula, que se probará durante seis meses, xorde dos problemas de loxística para a repartición dos alimentos e unha convivencia complicada con outros programas no piso de que dispón o departamento de Servizos Sociais. Desde hai meses traballábase nesta posibilidade, fraguando agora un acordo cun supermercado estradense que opera con este sistema de bonos. Agora comprobarase o seu funcionamento no día a día como alternativa á entrega periódica dos produtos ás familias.
Os bonos teñen carácter nominativo e remitiranos desde o departamento municipal de Servizos Sociais. En función dos integrantes da unidade familiar e as súas circunstancias, establécense bonos de 10, 20 e 50 euros. Serán achegados con carácter quincenal ou mensual, segundo os beneficiarios, como explicaba Amalia Goldar. A concelleira incidiu en que xa se realizou unha instrución interna no seu departamento, a modo de piloto para establecer criterios de distribución e acceso a esta modalidade.
«A xente terá liberdade de comprar o que precise, coa limitación de non adquirir bebidas alcohólicas», resaltou Goldar. No momento da entrega esixiranse resguardos de compra para levar a cabo un certo control das compras, aínda que se busca que con este sistema as familias se autogestionen nas compras de produtos de primeira necesidade.
Tras testarse durante estes meses e se se cumpren as expectativas o Concello crearía un regulamento, a incorporar ao borrador de emerxencia social no que está a traballar a área de Servizos Sociais. Amalia Goldar reiterou que estes bonos non poden entender como unha prestación que poidan solicitar de forma directa os cidadáns, senón que é un recurso que establecen os técnicos do seu departamento en función de necesidades específicas.