Gonzalo Louzao abre a súa rolda de encontros institucionais cunha reunión na Agasp
A ESTRADA
Entrevistarase cos responsables de todas as administracións
26 abr 2024 . Actualizado á 05:00 h.O alcalde estradense, Gonzalo Louzao, estreouse onte na faceta máis institucional do cargo cunha reunión na Academia Galega de Seguridade Pública (Agasp) co director xeral do organismo, Santiago Villanueva. O alcalde xa anunciara o luns —no seu primeiro día laborable no cargo— que unha das primeiras tarefas da súa nova axenda sería a solicitude de entrevistas cos responsables de todas as administracións públicas para facer seguimento de todos os proxectos locais en curso. Gonzalo Louzao quere ter todos os asuntos da súa man e aproveitar ademais a ocasión para presentarse formalmente como alcalde da Estrada e trasladar aos mandatarios supramunicipais as novas necesidades que vaian xurdindo no municipio.
Neste caso, con todo, a Louzao adiantóuselle a Dirección Xeral de Emerxencias, que foi quen tivo a iniciativa para celebrar esta primeira reunión. «Foi unha primeira toma de contacto para seguir estreitando relacións entre o Concello e Emerxencias, que ten aquí na Estrada dous servizos —a Agasp e o CIAE-112— que son un referente para toda España e que teñen unha importante repercusión no tecido social e económico local», declarou Louzao tras a entrevista.
Por outra banda, en relación coa Agasp, o Diario Oficial de Galicia publicou este xoves a convocatoria de catro novos cursos que ofertarán un total de 184 prazas para persoal das forzas e corpos de seguridade que traballan en Galicia. O prazo de inscrición ábrese hoxe e as accións formativas desenvolveranse neste primeiro semestre, grazas á colaboración entre a Agasp e o Sindicato Unificado de Policía (SUP).