López aproveitou a visita á obra da AG-59 e pediu a súa chegada ao Rollo
12 mares 2024 . Actualizado ás 05:00 h.As obras de desmonte do tramo da AG-59 que discorre exclusivamente polo municipio de Teo recibiron onte a visita do presidente da Xunta de Galicia, Alfonso Rueda; da consellería de Infraestruturas, Ethel Vázquez; e dos alcaldes de Teo e A Estrada, Lucía Calvo e José López Campos, respectivamente. Durante o encontro estiveron acompañados dun sequito de autoridades e técnicos da Xunta e da empresa que executa as obras, a UTE A Ramallosa, que integran Vías e Marconsa.
Os traballos do tramo da AG-59 comezaron en novembro do ano pasado e, segundo adiantou Alfonso Rueda, avanzan coa previsión de que estean rematados a finais do segundo semestre do 2025. Esta data manterase, aclarou o propio Rueda , sempre que o tempo acompañe durante a execución do proxecto, que está orzado en 36 millóns de euros.
As obras parten da ligazón da Ramallosa —no punto no que finaliza o trazado actual da autovía— e continuarán por unha zona de monte para rematar cunha ligazón que sae á AC-241, nas inmediacións de Pontevea. É un tramo de 3,54 quilómetros que disporá dunha calzada de 25 metros, con dous carrís de circulación por sentido. Terá tres pasos inferiores para manter a comunicación dun lado a outra da autovía, e alzarase un viaduto para superar o río Santa Lucía, así como dous pasos máis: un superior na Ramallosa e outro inferior na conexión coa vía AC-241.
O alcalde da Estrada, José López Campos, agradeceu a Alfonso Rueda que cumprise o compromiso que adquiriu en decembro do 2022, durante unha visita a aquel municipio, de iniciar as obras no 2023. Apuntou que a construción deste tramo mellorará as comunicacións dos municipios da «Galicia central». E aproveitou o acto para instar o presidente a avanzar nas obras do seguinte e último tramo, que unirá Pontevea coa Estrada, que están a unha distancia de 10 quilómetros pola estrada PO-841.
A alcaldesa de Teo, Lucía Calvo, apuntou que a autovía da Estrada «é unha obra moi necesaria que mellorará o desenvolvemento da economía de Teo». Asegurou que esta vía favorecerá ao futuro polígono industrial da Ramallosa, que impulsará o emprego. Tamén agradeceu a Rueda que se desbloquease este proxecto, «tras 16 anos de parálise».
Pola súa banda, o presidente da Xunta recoñeceu que as obras deste tramo estaban pendentes desde hai anos, unha demora que xustificou polo feito de que «gobernar require priorizar». Alfonso Rueda insistiu na aposta do Goberno autónomo por mellorar a rede viaria galega, o que vén supor, explicou, que «hoxe cada galego ten a 15 minutos unha vía de alta capacidade». Eloxiou o «bo ritmo» dos traballos dunha autovía que, asegurou, permitirá conectar Santiago e A Estrada «en dez minutos e sen pagar peaxes».
En novembro as máquinas da UTE adxudicataria do proxecto comezaron coa roza dunha ampla zona de árbores nas inmediacións da ligazón da autovía na Ramallosa. Durante a xornada de onte, a comitiva encabezada por Rueda presenciou o traballo das escavadoras que están realizando os movementos de terra para debuxar o que será o trazado da calzada da autovía cara a Pontevea.