Hoxe celébrase na Academia Galega de Seguridade Pública (Agasp) da Estrada o Congreso Anual do Foro de Responsables do 112 España, que retoma a súa actividade ata o xoves tras unha interrupción pola pandemia. O encontro consolídase como unha oportunidade para os encargados dos diversos centros xestores de urxencias do país, que porán en común as experiencias e novos coñecementos adquiridos durante os últimos anos.
Os participantes serán recibidos na Estrada polo director xeral de Emerxencias e Interior, Santiago Villanueva, e polo xerente da Axencia Galega de Emerxencias, Marcos Araújo. Haberá unha reunión de traballo na que abordarán o estado do sistema de avisos masivos á poboación ou o balance da localización móbil avanzada.
Tamén participarán nunha conferencia con Cristina Lumbreras, directora técnica da Asociación do Número de Urxencia Europeo. O xoves serán recibidos polo presidente do Parlamento, Miguel Santalices, e posteriormente acudirán á Feira Internacional de Defensa e Emerxencias (Sedexpo) que se celebra en Silleda.