O titular da Xunta comprometeuse co rexedor para mellorar a PO-213
23 sep 2025 . Actualizado á 05:00 h.O alcalde da Estrada, Gonzalo Louzao, acudiu onte a Santiago para reunirse co presidente da Xunta, Alfonso Rueda, no seu primeiro encontro institucional tras acceder ao cargo fai algo máis dun ano. Debaixo do brazo distintas peticións para acometer proxectos estratéxicos para o futuro do municipio. Louzao asegurou estar satisfeito tras concluír esa reunión co compromiso do titular autonómico de achegar fondos para a súa execución.
Entre esas iniciativas expostas polo rexedor destaca o proxecto para reformar a praia fluvial de Liñares, un espazo natural próximo ao centro urbano ao que acoden de forma asidua veciños e visitantes. Louzao pretende converter ese recinto nun espazo de referencia para o lecer e polo de dinamización turística. A Xunta foi a primeira porta onde tocou o alcalde para actuar nesta praia fluvial tamén coñecida como Porta Pousada, cuxa xestión asumía o Concello no 2020.
As principais liñas de actuación previstas para esa contorna natural en busca da súa transformación, que xa coñece Rueda dunha visita hai uns anos, analizáronse no encontro. Xa se conta cun anteproxecto que preservaría o valor ambiental dese enclave e que busca pór en valor as contornas fluviais da Estrada, sumando accións para aumentar a súa relevancia como recurso turístico. Louzao desvelou o compromiso do presidente da Xunta de achega económica para esa iniciativa.
Outro dos asuntos analizados entre ambos os políticos tivo á estrada autonómica PO-213 A Estrada-Ponte Ulla como protagonista. O rexedor explicou a Rueda os problemas que trasladan os veciños e usuarios deste vial polo seu mal estado. O presidente autonómico avanzou a súa intención de incluír as intervencións máis prioritarias nesta infraestrutura nos presupostos do 2026, para seguir despois incluíndo novas actuacións de mellora en futuros plans da Xunta.
Prolongación da AG-59
A marcha das obras de prolongación da autovía AG-59 ata A Estrada foi outro asunto abordado nesta reunión institucional. O titular do Goberno galego confirmou ao alcalde que as obras avanzan segundo o cronograma previsto. Desta forma prevese estrear a finais de ano o tramo ata Pontevea, para despois comezar co último, que chegará ata Ou Rolo, na parroquia estradense de Santa Cristina de Vea.
Gonzalo Louzao asegurou ao finalizar esta primeira reunión institucional con Alfonso Rueda que a Xunta «está nas cousas importantes para o futuro da Estrada». Entre elas a futura ampliación pública do polígono de Toedo, que recentemente foi exposto aos empresarios locais pola conselleira de Economía e Industria, María Jesús Lorenzana. Apuntou o alcalde que seguen aflorando peticións e novas propostas que precisan apoio autonómico, pero puido constatar o apoio e o papel relevante que ten o actual Executivo autonómico en ningúns dos proxectos máis emblemáticos en busca da transformación do municipio estradense.
Equipamento do edificio xudicial e vivendas públicas
O encontro permitiu a ambos os políticos abordar outros asuntos, como a situación do novo edificio xudicial construído na Baiuca. A obra xa está rematada e Rueda informou o rexedor que se está traballando para proceder a equipar e amoblar esas dependencias que permiten aglutinar nun mesmo espazo as actuacións dúas sedes estradenses, así como reforzar o partido xudicial. Está previsto que poidan abrirse os novos xulgados en próximas datas. E o presidente autonómico comunicou a Louzao que está en fase de redacción o proxecto de 28 novas vivendas de promoción pública na Estrada.