Luz verde á incorporación do canteirán do Compostela, que convenceu o corpo técnico despois de semanas adestrando co primeiro equipo esta pretemporada
20 ago 2025 . Actualizado á 05:00 h.Carrusel de incorporacións do Estradense, que apontoa o seu persoal a poucas semanas de que empece a competición ligueira. Se onte anunciaron ao extremo Gerard Porto, este martes o club comunicou a fichaxe de Rodrigo Fernández, canteirán do Compostela que estivo a proba durante a pretemporada. O mediapunta de 19 anos convenceu o corpo técnico, que deu luz verde á súa contratación despois de ver en primeira persoa as súas virtudes .
Procedente do xuvenil de División de Honra do Compos, Rodrigo Fernández disputou minutos en todos os amigables que leva xogado ata a data o Estradense. «Foi un salto de nivel moi grande, abrigo ao haber xente de todas as idades, iso faio máis difícil», explica. «Chamáronme nada máis acabar a tempada pasada e de primeiras xa lles dei o si», lembra o mozo centrocampista.
Ilusionado, pretende agarrar con forzas esta oportunidade e facerse cun oco na rotación de Manuti. «Dixéronme que podería valer para xogar en Terceira, a verdade é que tiña moitas ganas de competir nesta categoría», asegura. Para el esta é unha «tempada de transición». O obxectivo é ser unha esponxa e crecer como futbolista nun equipo aspirante ao ascenso a Segunda RFEF.
Proxección
«O feito de estar no Estradense, que é un equipo punteiro da categoría, é algo a valorar», comenta Rodrigo, quen ademais pon o foco na aposta rojilla pola canteirán. «Por iso tamén é un proxecto que me atrae bastante, polas oportunidades que dan á xente mozo», apunta o ex futbolista do Compostela.
Sobre as súas características, o centrocampista destaca a súa achega para o ataque. «É unha pregunta moi difícil (ri), pero creo que son un xogador bastante técnico e cunha visión de xogo decente. A nivel de ataque podo achegar», explica.
Cualidades que virán ben a un Estradense que trata de tapar os buracos que deixaron as saídas a última hora de Juanín e Elías. Polo momento, con Gerard Porto e Rodrigo Fernández conseguiron apontoar a medular e o ataque.
Próximos compromisos
O Estradense xoga mañá o seu sexto partido da pretemporada. O rival será o Sigüeiro, no campo Municipal ás 21.00 horas. A entrada é gratuíta. O pasado venres conquistaron o triangular de Cuntis.