A modelo cruceña participa en certames de beleza internacionais
17 ago 2025 . Actualizado a las 05:00 h.O de Iris Miguélez Méndez (Vila de Cruces, 1998) é un deses casos que demostran que o camiño non sempre é en liña recta e que ás veces non fai falta máis que una casualidade para que a vida de un xiro de 180 graos. Aos seus 27 anos acaba de proclamarse primeira finalista do certame internacional de beleza Universal Woman en Jaipur, comenzando no mundo da modelaxe dunha forma repentina e inesperada. «Foi totalmente de casualidade. Paráronme no centro comercial onde se celebraba o cásting e ofrecéronme participar», lembra. Foi entón se decidiu a probar sorte nos concursos de beleza, debutando no Miss Grand Galicia en 2019. A partir de aí converteuse en Miss Grand España e en 2021 participou no Miss Grand Internacional en Tailandia.
Tras este último, optou por facer un parón durante un tempo. «Ás veces é preciso parar e descansar. Agora non sei se despedirme xa ou se seguir, isto é coma quen fai unha tatuaxe, sempre queres máis», comenta entre risas. Non obstante, en 2024 volveu a exercer de modelo, esta vez no certame Reino Nacional de Belleza (RNB) España, converténdose levando o primeiro posto e a pasada semana en primeira finalista do Universal Woman 2025. A cruceña afirma que a pesar de non gañar, sinte este último logro como un trunfo tanto pola súa evolución profesional como persoal.
A participación de Iris nestes concursos de beleza, a pesares de partir dunha casualidade, supón un longo proceso de preparación que a modelo clasifica en varias disciplinas: adestramento físico, oratoria, presenza escénica e unha importante preparación mental. Aínda que a parte física é fundamental, sinala que é moi importante a estar forte psicoloxicamente pola forte presión á que se somete durante as competicións. «Por exemplo as críticas, ao comezo pensamos que lle temos que gustar a todo o mundo, pero co tempo e co crecemento entender que non pode ser así», conta.
Carreira deportiva
Moito antes de iniciarse como modelo, dende ben pequena interesouse polo deporte. Durante a súa infancia practicou múltiples deportes como danza e patinaxe artística, destacando especialmente na loita libre. Este último sempre estivo presente na súa casa por influencia de seu tío, que foi quen a animou a introducirse nesta actividade no Keltoi de Vila de Cruces. Posteriormente, cando estaba cursando terceiro da ESO, comezou a adestrar no Centro Galego de Tecnificación Deportiva en Pontevedra.
Unha estancia que axudouna a pasar na actualidade longas tempadas lonxe da casa por mor do seu traballo como modelo. «Grazas á educación que recibín sempre fun moi independente. Lévalo mal? Si, pero sei lidiar con iso», apunta. A pesar disto, non é unha tarefa doada estar lonxe da familia, que foi un dos apoios fundamentais ao longo do seu camiño. «Sempre me apoiaron, nunca me dixeron que non», comenta.
Profesional sanitaria
No ámbito profesional, a cruceña compaxina a modelaxe coa súa profesión: a enfermaría. Cando se decidiu polos estudos, non tiña moi clara cal sería a súa elección, e foi de novo o seu tío quen a animou a decantarse pola rama sanitaria, cursando finalmente o grao de Enfermería na Universidade de Santiago de Compostela (USC). «Sempre me gustou axudar aos demais, é unha profesión que me encanta e moi ligada á miña personalidade», comenta.
Formar parte de concursos de beleza como modelo trouxo múltiples cousas positivas para Iris Miguélez, tanto no ámbito profesional coma no persoal. Un dos factores que destaca da súa experiencia en distintos lugares do mundo é a diferenza cultural, por exemplo en países como a India, onde estivo recentemente participando no Universal Woman. «É moita diferenza cultural en canto ao que temos en Europa. Moitas veces tamén sirve para valorar aquilo que temos».
Experiencia
Por outra banda, Iris destaca o bo ambiente e compañeirismo que houbo entre as distintas candidatas. Neste último certame na India, recoñece que decidiu non falar con ningunha das participantes antes de coñecelas en persoa para non ter ningunha idea preconcibida, sorprendéndose finalmente da boa relación que se estableceu durante a súa estancia.
«Houbo moi bo ambiente, voume de regreso para a casa con moi boa enerxía», sinala Iris. A pesar de tratarse dunha competición, a modelo subliña que sempre se sentiu apoiada polas súas compañeiras, que lle ofreceron axuda cando o precisou. «Tiven un problema coas maletas, que non me chegaron ata o último día, e houbo moito compañeirismo, sentinme moi apoiada», explica.
Despois destes meses nos que se dedicou ao traballo e ao ximnasio, Iris apunta que o seu plan favorito é estar coa súa familia e volver a Vila de Cruces cando ten un oco. Ademais, gústalle moito viaxar sempre que pode.
«Non, nunca me vira capaz de facer isto. É unha das razóns polas que eu quero facer ver a tódolos rapaces e rapazas que as portas están abertas para todo o mundo», afirma, sostendo que aínda que dende fóra parece imposible, todo se pode conseguir.