O estradense Mario López cultivou cinco ouros noutras tantas probas dos xogos nacionais de natación en Lorca
16 jun 2025 . Actualizado á 05:00 h.Cinco anos de espera atesoura xa no seu corpo e a súa mente o estradense Mario López. Non pensen que para comprar unha casa ou darse un capricho. Detrás deses 1.825 días —ningún máis, que seguro houbo algún bisiesto— está a súa loita por mellorar a súa calidade de vida co terceiro transplante de ril. Diagnosticado dunha enfermidade renal crónica con tan só trece anos, agora con máis de tres décadas xa ás súas costas atopou na natación unha válvula de escape para paliar as múltiples consecuencias da súa doenza, que lle obriga ademais a dializar tres veces á semana no hospital.
Na auga atopou a vía para mellorar a súa condición fisica. Directivo de Alcer, esa paixón pola nadar levou xa a competir a nivel nacional e europeo, cultivando múltiples medallas e recoñecementos. Se o pasado xullo sumaba cinco metais en Lisboa nos Xogos Europeos de Trasplantados e Diálises, esta fin de semana sumaba outras seis medallas na competición nacional celebrada na localidade murciana de Lorca.
Mario López colgouse metais áureos nas probas de 25, 50 e 100 metros libres, así como nos 50 tanto costas como braza, mentres no 4 x 25 libres cultivaba un bronce. Como resaltaba este veciño da Estrada, desexa con forza «volver estar san, non sentir fatiga constante, non ter náuseas, dores musculares, de cabeza, poder comer de todo, poder beber e non pasar sede». Espera ese terceiro transplante de ril que lle evite ter que ir tres veces á semana ao hospital «e conectarme a unha máquina durante catro horas e media para, ao acabar, ir directo á miña cama porque non podo co meu corpo».
Anima a quen leva como el tempo en hemodiálisis para afrontar algunha actividade deportiva. «O máis habitual non é estar nas condicións físicas nas que estou eu, por iso fomento tanto o deporte como tratamento para a miña enfermidade, sempre elixindo un de acordo á capacidade física de cada persoa; se non fose pola natación, non estaría así», remarca Mario López. Unha práctica que lle levou a cultivar éxitos e o recoñecemento de toda A Estrada, xa que o pasado foi elixido como o mellor deportista do municipio. Un recoñecemento que lle encheu de orgullo. E de esperanza.