O PSOE estradense tacha de «insuficiente e tardía» o plan para lograr máis vivenda
DEZA
O PSOE da Estrada, a través do edil Román Suárez, cualificou onte de «insuficiente e tardía» a anunciada construción por parte da Xunta de 28 vivendas de promoción pública na contorna de Mercadona. Unha valoración que estendeu á proposta presentada polo goberno local en mobilización de vivenda que se debateu este mércores na comisión municipal de Reto Demográfico. «As propostas viñeron a medio facer e por iso a moción quedou amais da mesa, sen ditame».
Suárez lamentou que o PP non acerte coas medidas para adoptar para contar con vivenda, cuestionando un goberno «que levou á Estrada á situación máis delicada que se recorda; a proposta dunha bolsa de vivenda xa a fixemos os socialistas hai cinco anos, e agora o PP intenta vendela como nova». Augura que resultará un fracaso polos «escasos incentivos que se dan» e a propia organización que propón o goberno local, que está «na procura de medidas milagro que non existen».
O concelleiro do PSOE cre que esas medidas non reverterán a tendencia actual, requiríndose políticas económicas e industriais «ben distintas ás que desenvolveu o goberno do PP». Respecto ao acordo da Xunta, considera que A Estrada «quedou a medias» ao aludir a que o Concello cedeu terreos onda unha solar propiedade do IGVS e anunciou que se farían sesenta vivendas. Ao final, remarcou, o terreo autonómico non se utilizará e construiranse 28 no cedido. «Gonzalo Louzao fixo mal os seus deberes», considerou Román Suárez.