O triste balance da N-640 na Estrada: nove accidentes e dous mortos en seis anos
DEZA
PSOE, BNG e Móvete esixen medidas para reducir a sinistralidade
03 abr 2024 . Actualizado ás 05:00 h.A oposición estradense reaccionou de forma unánime e contundente ao novo atropelo rexistrado este luns no tramo urbano da estrada N-640. PSOE, BNG e Móvete coinciden, aínda que con matices, na esixencia de medidas efectivas para reducir a sinistralidade.
O PSOE presentou ante a Unidade de Estradas do Estado en Pontevedra, dependente do Ministerio de Transportes, unha solicitude formal para que se realice un estudo de seguridade viaria e determínese cal é a mellor solución ao problema.
Na súa petición, os socialistas lembran que a estrada nacional atravesa o centro urbano da Estrada en dirección oeste-este e que conta cun total de 18 pasos de peóns nesta travesía. Subliñan tamén que á altura do punto quilométrico 204.300 atópase o consistorio e conflúen ademais distintos edificios públicos e aparcadoiros disuasorios, o que provoca que o cruzamento de peóns sexa continuo ao longo de todo o día. O PSOE informa á Unidade de Estradas do Estado de que nese punto se producen atropelos con frecuencia e, nos últimos cinco anos, dous deles tiveron como resultado senllos falecementos. Ademais, o paso de peóns non conta con regulación semafórica, iluminación adecuada nin outras medidas de acougado de tráfico «que se evidencian como necesarias».
Por estas razóns, os socialistas piden que se adopten medidas de acougado de tráfico para reducir a velocidade de paso dos vehículos e mellorar a seguridade dos peóns que cruzan e que se encargue un informe técnico para valorar a pertinencia e posibilidade de implantar algunha das seguintes medidas: control semafórico, mellora da iluminación que indique a presenza do paso, instalación de resalte ou eliminación de prazas de aparcadoiro na zona para gañar visibilidade.
O PSOE local declárase tamén preocupado polo estado xeral de conservación do firme da vía e pola inseguridade no tramo de Liñares, para o que se rexistrou unha proposta no Ministerio de Transportes que está en avaliación.
O portavoz do PSOE, Luis López Bo, considera que se lle deben esixir melloras nas estradas «a todas as administracións» e pide ao PP que tome exemplo e presione á Xunta para que mellore a seguridade nas estradas A Estrada-Santiago e Aguións-Ponche Ulla.
O BNG, pola súa banda, fixo unha recompilación de todos os atropelos que houbo na N-640 ao seu paso pola Estrada desde o 2019 para facela chegar ao Congreso e ao Senado pero tamén para enviala ao ministro de Transportes, Óscar Ponte, a través de Twitter. «Xa que é tan activo nesta rede social, entre zasca e zasca ao mellor ten un intre para ocuparse das cousas que importan», di o portavoz do BNG, Xoán Reices, que cualifica a situación de insostible: desde o 2019 houbo nove atropelos e dous acabaron con falecemento.
Así mesmo, Móvete expón a necesidade de fixar un reductor de velocidade nas proximidades do paso de peóns do Concello e pide que se reforce a seguridade xunto ao paso de peóns próximo á escola infantil Elfos. A formación veciñal pide tamén ao goberno local que inste o Ministerio de Fomento para que, a maiores de incrementar a seguridade na zona, mellore o estado da N-640 ao longo de todo o municipio. «É unha vergoña que por riba de non iniciar a construción da variante que leva máis de dúas décadas comprometida, tampouco se manteña en condicións a N-640», lamenta a edil Mar Blanco .