Páez asegurou que ante a UD Ourense perderon dous puntos
25 mares 2024 . Actualizado ás 19:26 h.O empate ante a UD Ourense do pasado sábado non deixou satisfeito ao Estradense. O gol no 90 que puxo as táboas supuxo un xerro de auga xeada para os homes de David Páez, que ademais de adiantarse cun gol de Juanín no 80, dispuxeron de numerosas ocasións para aumentar a renda e finiquitar o partido. Un punto que sabe a pouco, de feito, o adestrador asegurou tras o choque que se foron «cunha sensación agridoce» e que perderan dous. Con todo, eloxiou o esforzo dos seus xogadores, destacando o seu xene competitivo «nun escenario difícil e diante dun equipo feito completamente para ascender».
Á hora de explicar o porqué do empate no tempo de prolongación, Páez detallou que a UD Ourense é un equipo que sacou varios partidos adiante nos instantes finais. Un decoro que non puido frear o Estradense. «Nós apertamos durante todo o partido, pero no desconto meteron moita xente arriba e empurraron moito», declarou. No entanto, recoñeceu que houbo varios desaxustes que puxeron en bandexa o empate local. «Estivemos mal ubicados nun centro lateral, logo fixemos un despexe erróneo que lle caeu a un xogador deles na área pequena», lamentou.
Con ou sen vitoria, o que quedou patente é o bo momento de xogo que atravesan os da Estrada. Desde o parón invernal o equipo mellorou o seu nivel claramente, o que lles permitiu saír do descenso. Nas últimas xornadas non puideron afastarse os suficiente, mantendo a día de hoxe unha distancia de tres puntos.
En gran parte isto débese á melloría doutros equipos de abaixo como o Viveiro, arrastrando a rivais como Betanzos ou Paiosaco que parecían tranquilos na primeira volta. O Estradense é duodécimo con 30 puntos, a tres do conxunto da Mariña, que volveu caer a postos de descenso.
Dous duelos fundamentais
Esta semana Santa haberá ración dobre de fútbol no Municipal. Primeiro o xoves, cando reciban a partir das 12.00 horas ao Pontevedra B. O segundo envite será o domingo ás 18.00 horas contra o Alondras. Páez asegura que verse tan preto do descenso non está a afectar ao persoal, convencida de que o traballo dará os seus froitos a final de tempada.
«A nivel mental o equipo está forte, compiten e adestran ben. Agora o que temos é que preparar moi ben estes dous partidos que veñen, son xornadas fundamentais porque nos nove partidos que quedan todos os equipos apertarán ao máximo», afirmou. O duelo do xoves medirá ao Estradense contra o penúltimo, de quen se atopan a dez puntos, unha oportunidade de ouro para dar un salto na clasificación.