A cota de pesca salmonera no Ulla redúcese á metade, ata os quince exemplares
DEZA
A tempada arrinca o 1 de maio nos cotos da zona
21 feb 2024 . Actualizado ás 05:00 h.O Diario Oficial de Galicia (DOG) publicou onte a orde da Consellería de Medio Ambiente pola que se establecen as normas de pesca nas augas continentais de Galicia neste 2024. No que respecta á pesca do salmón, esta tempada haberá un cambio significativo con respecto á cota, pasando de trinta a quince exemplares no río Ulla. A tempada arrinca nos cotos salmoneros de Pontevea, Santeles, Sinde e Ximonde o 1 de maio e estenderase ata o 30 de xuño.
O ano pasado tan só se produciron cinco capturas, un número baixo a pesar de incrementarse nunha con respecto ao 2022. Por outra banda, non se notificou o aumento da tempada ao mes de xullo tal e como reclamaban algúns pescadores. En relación aos cebos, poden ser naturais autorizados como vermes e quisquillas, ou ben artificiais como mosca ou culleriña.
Reo e troita
O período hábil para a pesca do reo irá do 1 de maio ao 31 de agosto en Pontevea, Santeles, Sinde e Ximonde, mentres que no resto de masas de auga da zona rematará un mes antes. A cota de captura establécese en dous exemplares por persoa e xornada cunha dimensión mínima de 35 centímetros. En canto aos cebos, permítense os mesmos que para o salmón.
A troita comezarase a pescar o 17 de marzo e rematará o 31 de xullo, aínda que se prolongará ata o 30 de setembro nas zonas de pesca sen morte e atrasarase ata o 1 de maio en augas salmoneras ou de reo. A cota é de seis troitas diarias cunha talla mínima de 19 centímetros.
Ademais, vedaranse en todas as augas o cangrexo de río, a reñosa, o espiñento, a zamborca e a anguía. A saboga só se autoriza no tramo do Ulla entre a presa de Couso e a desembocadura do 1 de maio ao 9 de xuño.
Réximes especiais
No río Pontiñas ou o de Cabritas, en Lalín, autorízase a pesca de ciprínidos durante todo o ano no tramo comprendido entre a parte superior da lagoa do Auditorio e Ponche dá Devesa. No Ulla, co gallo da Festa do Salmón autorizan a celebración do concurso de pesca nos cotos de Sinde, Pontevea, Santeles e Ximonde.
Tamén no coto de Couso pola celebración da Festa do Escalo.