A cifra de residentes no estranxeiro que poderán participar nas eleccións autonómicas do 18 de febreiro aumentou en case 7.700 persoas desde o 2001
14 ene 2024 . Actualizado ás 05:00 h.Nas próximas eleccións autonómicas están chamados ás urnas 72.887 veciños das comarcas de Deza e Tabeirós-Terra de Montes. Deles, preto do 30 % residen no estranxeiro. Unha cifra que aumenta ano a ano e que se sitúa para este 2024 en máximos históricos. En total son 20.317 os emigrantes con dereito a voto, contabilizándose 26 máis que nas eleccións ao Parlamento de Galicia en xullo do 2020. Un incremento lixeiro pero constante en cada cita electoral desde que comezou o século.
O aumento de votantes que residen no estranxeiro mostra a configuración demográfica das comarcas, cunha marcada perda de poboación en busca de mellores oportunidades laborais ou formativas. Nas eleccións do 2001 podían votar 12.623 emigrantes, mentres que hoxe día ten garantido o seu dereito 7.685 persoas máis, un incremento do 60 %.
A tenor dos datos que achega o Censo Electoral de Españois Residentes no Estranxeiro (CERA), por concellos é A Estrada o que ten o maior número de poboación residindo fose. Son 5.374, aínda que supoñen 33 menos que nos comicios autonómicos do 2020 (5.407). Aínda que o número de votantes no exterior aumentou, en termos particulares rexistrouse un descenso en todos os municipios salvo nos de Lalín e Forcarei.
No caso forcaricense é testemuñal, xa que o censo aumentou en dúas persoas, acadando as 2.079. Con todo, é o incremento na capital dezana o que mantén a tendencia á alza. Os lalinenses que residen fóra de España son 5.032, case un centenar máis que catro anos atrás (4.933). Se comparamos os datos actuais cos de hai dúas décadas observamos que en Lalín o voto estranxeiro creceu en 1.959 persoas, mentres que na Estrada o aumento foi de 2.026 electores.
Silleda rolda os tres mil
En Silleda a caída de votantes estranxeiros é mínima, con apenas unha quincena menos, pasando de 2.945 a 2.932. En calquera caso tamén se dá unha diferenza notable cos comicios do 2001 (2.062). En Agolada o censo descendeu en 6 votantes (760) e en Vila de Cruces en 3, sumando 1.558. En Dozón as diferenzas tamén son mínimas, cun único elector menos que catro anos antes (601).
Nestas eleccións os cambotes con dereito a voto que viven no exterior son menos de dous miles, concretamente 1.981, case unha vintena por baixo.
Hai mil electores menos que nos anteriores comicios
Se atendemos aos datos globais, indicando a poboación total con dereito a voto, esta reduciuse na zona en 1.283 persoas, unha caída do 2 % en catro anos. En xullo do 2020 o número de potenciais electores foi de 74.170. Para os novos comicios á Xunta son 72.887 os veciños de Deza e Tabeirós-Terra de Montes chamados ás urnas.
O descenso de votantes non é un caso único destas eleccións, xa que a cifra non para de baixar desde hai anos. Curiosamente, o descenso neste lapso de tempo é maior que se comparamos os datos actuais cos de hai dúas décadas, cando o censo marcaba 73.962 electores, 1.075 máis.
A Estrada na cabeza
A Estrada segue o municipio que aúna máis persoas con dereito a voto, en total 22.441. Con todo, segue caendo no censo con 272 electores menos. Despois está Lalín, con 21.027 (-226) e Silleda, que perdeu 49 inscritos ata situarse en 10.160.
Vila de Cruces conta con 5.924 persoas (-217), Forcarei 4.911 (-171), Agolada 2.841 (-65), Rodeiro 4.028 (-176) e Dozón 1.555 (-102). Estes dous concellos son os que máis sofren a redución de electores.
Os residentes no estranxeiro poderán recibir toda a documentación nos seus domicilios
Os emigrantes que decidan votar terán unha notable diferenza respecto dos anteriores comicios, xa que se anulou o voto rogado. Antes para participar debían solicitar o voto previamente na Delegación Provincial da Oficina do Censo Electoral, con todo nesta ocasión poderán recibir toda a documentación electoral aos seus respectivos domicilios.
Haberá dous envíos, o primeiro entre o 13 e o 19 deste mes con sóbrelos de votación, os certificados de estar inscrito no CERA e unha folla explicativa de todo o proceso electoral. O segundo será entre o 23 de xaneiro e o 13 de febreiro cando xa estean todas as candidaturas presentadas. No momento en que teñan a documentación necesaria, os residentes no estranxeiro poderán votar na embaixada ou enviar a documentación por correo.