Cáritas pide apoio para nutrir as reservas dos alimentos que escasean
02 dic 2023 . Actualizado á 05:00 h.Cáritas Parroquial da Estrada acaba de activar a campaña de recollida solidaria de alimentos denominada Operación Quilo, que contribúe a nutrir durante todo o ano o banco de alimentos da entidade.
Co arranque da próxima semana comezará a instalación nos establecementos colaboradores de caixas vermellas identificadas co logotipo de Cáritas para que os estradenses poidan depositar alimentos non perecedoiros. As caixas estarán nas tendas de alimentación Artesa, Chedas, A Santiaguesa, Villa Brasil e a taberna de Ouzande. Tamén se colocarán en catro supermercados locais: Alcampo, Familia, Froiz e Gadis. No caso de Gadis e Froiz, por políticas de empresa, as caixas para a recollida dos alimentos estarán dispoñibles durante uns días concretos. No resto as doazóns poderán realizarse en calquera momento entre o martes da próxima semana e o día 6 de xaneiro.
Cáritas A Estrada conta cunha colaboración co supermercado Mercadona que garante entregas diarias de alimentos que cobren unha parte das necesidades. Por esta razón, desde a entidade piden ás persoas colaboradoras que centren as súas achegas nunha serie de produtos concretos que son os que fan máis falta no banco de alimentos. Conservas, azucre, cacao, aceite e alimentos infantís son os que máis escasean neste momento. Tamén se solicita que, no caso dos legumes, achéguense na súa versión precociñada en latas ou frascos, xa que a cocción supón un gasto enerxético que moitas familias non poden asumir.
Quen prefira contribuír cun donativo económico poden depositalo na hucha de Cáritas colocada na igrexa parroquial ou directamente no local de Cáritas (San Paio, 22). O teléfono de contacto para resolver calquera dúbida ou achegar suxestións é 617 865 255.
Segundo explican desde Cáritas, na actualidade hai máis de 150 familias que reciben regularmente axuda da entidade. A maioría son do propio municipio, aínda que tamén hai algunhas de concellos próximos como Forcarei ou Vila de Cruzamentos, así como outras de orixe marroquí, procedentes de Sudamérica ou do este de Europa, todas elas residentes na Estrada.
Requisitos do beneficiario
Para acadar o status de beneficiario destas axudas, Cáritas solicita acreditación de ingresos e gastos, volante de empadroamento e outro tipo de documentación, grazas ao contacto aberto co departamento de Servizos Sociais do Concello, que a maiores achega 4.500 euros anuais para cubrir as necesidades máis inmediatas.
Ademais de facilitar alimentos e roupa, Cáritas cobre gastos de alugueiro de vivenda ou recibos de luz e gas e atende puntualmente a transeúntes aos que se lles facilita un cuarto ou comida, polo que as achegas económicas resultan cada vez máis necesarias. O número de socios que abonan cotas fixas, con periodicidade variada, rolda os 75. Cáritas anima a colaborar desta forma para garantir a liquidez necesaria para afrontar todo tipo de gastos. Por outra banda, a entidade tamén busca ampliar o grupo de voluntarios que sustentan todas as súas actividades.