Cáritas sela acordos con tres súpers estradenses para repartir a diario comida preparada
DEZA
A Operación Quilo logrou reunir cinco toneladas de alimentos
26 ene 2023 . Actualizado á 05:00 h.Cáritas Parroquial A Estrada acadou acordos con tres establecementos de alimentación estradenses para recoller diariamente comida preparada que non foi vendida e distribuíla entre os usuarios habituais do servizo de alimentos da oenegué. Ata o momento, Cáritas contaba con acordos deste tipo co supermercado Familia e con Alimentación Artesa, que achegan sobrantes ao longo de todo o ano. En decembro, cando Cáritas expúxolle á firma Mercadona a posibilidade de colaborar na campaña de recollida de alimentos coñecida como Operación Quilo, a empresa ofreceu como alternativa a achega diaria da comida preparada que non foi vendida ao longo da xornada para a súa distribución entre os usuarios de Cáritas. Neste momento trabállase na concreción dunha fórmula válida para efectuar a recollida diaria.
Na última Operación Quilo, Cáritas logrou reunir cinco toneladas de alimentos non perecedoiros que serán distribuídos ao longo deste ano entre as familias máis desfavorecidas. A oenegué agradece a solidariedade estradense. De todos os xeitos, as reservas non adoitan chegar para nutrir o banco de alimentos durante todo o ano e, ademais, algúns tipos de alimentos teñen caducidades curtas. Por este motivo, a empresa estradense Martínez Otero, que leva anos colaborando con Cáritas, comprométese a adquirir mensualmente os alimentos que se seleccionen en cada momento por valor de 300 euros en cada compra.
A oenegué busca voluntarios para activar novos proxectos locais
Coa intención de pór en marcha novos proxectos, Cáritas fai un chamamento á incorporación de voluntarios. A súa pretensión é engadir novas accións a programas que xa están consolidados como os de axuda escolar, taller de costura ou ensino de español básico. Non se requiren coñecementos específicos, aínda que ningúns, como o manexo das Tics, poderían ser de moita utilidade. O único que se necesita é algo de tempo libre e vontade de cooperación. Os interesados poden contactar con Cáritas nos teléfonos 617 865 255 ou 986 570 297 ou en caritasaestrada@hotmail.com. Tamén no local do número 22 da rúa San Paio.