Mentres no 2012 incautáronse 4.144 efectos, no 2021 foron apenas 2
22 ene 2023 . Actualizado ás 05:00 h.A caída de vendas de soportes físicos de películas e discos, xunto co auxe das plataformas de visionado en streaming e musicais traduciuse na provincia de Pontevedra na práctica desaparición dos delitos contra a propiedade intelectual. Así, só nunha década esta tipoloxía delituosa caeu un 87,5 %, pasando das dezaseis infraccións penais contabilizadas polos corpos e forzas de seguridade no 2012 a apenas dous no 2021, último ano do que, polo momento, ten rexistros oficiais o Ministerio do Interior.
O portal estatístico de criminalidade realiza, deste xeito, un debuxo de como foi a evolución destes delitos ao longo dos últimos anos pondo de manifesto que desde o 2019 estabilizáronse na mesma cifra anual. A serie anual, doutra banda, constata que foi no 2017 cando se acadou o tope inferior, cun único delito investigado, mentres que no extremo oposto, e restando o 2012, situouse o 2013 cunha decena.
De igual modo, recóllese que o 2021 foi o primeiro ano de toda a década en que non se produciron detencións, mentres que nos dous exercicios previos si que se practicou, polo menos, un arresto. Pola súa banda, no 2013 foron doce e no 2012 foron tres, así como no 2014 foron sete.
Esta mesma tendencia obsérvase no volume de incautacións realizadas polos investigadores en Pontevedra, tendo en conta que se no 2012 comisáronse 4.144 compactos, DVD ou reprodutores, entre outros efectos, dez anos máis tarde foron unicamente dous. A estatística oficial reseña, a este respecto, que ambas as intervencións se produciron nun establecemento de venda ao público ou un local.
Defunción do top manta
Curiosamente, isto constata a aparente desaparición do top manta das rúas das localidades pontevedresas. E é que a última vez que se tivo constancia da intervención dun disco compacto ou DVD na vía pública na provincia foi no 2014, ano no que se comisaron 380 efectos. Esta cifra, á súa vez, xa supuxo un descenso significativo con respecto aos anos precedentes, tendo en conta que no 2013 foran 925 as incautacións e no 2012, 681.
Outros aspectos, canto menos curiosos, é que nesta década non se produciu comiso algún deste tipo de efectos, nas contornas aduaneiras dos portos pontevedreses ou do aeroporto, como tampouco os houbo en naves industriais, fábricas ou almacéns, mentres que as incautacións en domicilios privados ou particulares foron residuais. Así, tívose constancia de tres intervencións no 2015, unha no 2017 e outra dous anos despois.
En canto aos efectos que, tradicionalmente, foron protagonistas deste tipo de delincuencia, os discos compactos e DVD ocupan o máis alto do escalafón. Só na última década, as forzas da orde sacaron do mercado negro un total de nove mil copias piratas de películas ou discos musicais. E iso tendo en conta que nin no 2021, nin no 2020 produciuse incautación algunha en Pontevedra.
Outros cinco obxectos encádranse baixo a epígrafe de software, informática e electrónica, mentres que 160 recóllense como «outros» e non hai constancia algunha da intervención dalgún tipo de material reprográfico.
As roupas de marca, os obxectos máis falsificados polos piratas industriais
Moi vinculados cos delitos contra a propiedade intelectual son aqueloutros que atentan contra a propiedade industrial, ámbito no que as falsificacións de toda clase de pezas de vestir de recoñecidas marcas comerciais lideran o ránking de obxectos máis pirateados. Así, ao longo do pasado ano, as forzas e corpos de seguridade incautáronse na provincia de 2.268 pezas falsificadas, cifra só superada polo apartado de «outros» con 3.552 comisos e que supera amplamente as tres intervencións de electrónica ou as dúas do sector da marroquinería e os complementos de moda.
En todo caso, e a diferenza dos delitos contra a propiedade intelectual, séguense producindo actuacións policiais para pór coto aos piratas industriais. A estatística, neste sentido, pon de manifesto que o 2021 puxo fin a varios anos nos que as intervencións se ían reducindo significativamente de forma periódica. Así, fronte aos 306.037 comisos do 2017, dos que 300.013 foron de complementos de vestir, pasouse a 7.605 un ano despois, a 4.834 no 2019 e a 2.206 no 2020.
Ademais, as 5.825 incautacións do 2021 superan amplamente as 3.855 de fai dez anos.
Xoguetes e calzado
Doutra banda, ao longo dos últimos exercicios, producíronse na provincia incautacións de calzado, como os 1.382 pares comisados no 2017; reloxos, caso dos 643 intervidos no 2013; xoguetes, como os 243 interceptados dous anos despois; ou perfumes, como os 222 sacados do mercado no 2012. Iso si, en ningún momento da seria histórica constatouse a presenza de bebidas ou comestibles falsificados na provincia.
Curiosamente, este aparente repunte de comisos non se traduciu, como cabería agardar, nun aumento dos delitos, xa que estes se reduciron acadando a cifra máis baixa da última década. De feito, no 2021 tívose constancia en Pontevedra de once feitos delituosos, dos que unha decena se consideraron esclarecidos e detívose ou investigou a unha ducia de persoas.
Trátase de algarismos que contrastan cos que rexistraba a provincia unha década atrás, tendo en conta que no 2012 denunciáronse 55 feitos, mentres que se esclareceron 56 —polo menos, unha das denuncias resoltas procedía do ano anterior, o que explica este aparente contrasenso— e arrestouse ou imputou a outras tantas persoas. Foi un ano despois cando se acadaron as cifras de criminalidade máis elevadas, con 68 feitos delituosos que determinaron a detención ou investigación 52 persoas. Naquel 2013, os responsables policiais conseguiron levar a bo porto un total de 67 investigacións de distinta índole.
Pero, onde teñen lugar estas actuacións? O Ministerio do Interior reseña que, no que respecta ao 2021, 3.545 obxectos estaban postos á venda en comercios, mentres que outro 403 eran ofertados en postos de venda ambulante que contaban con todas as autorizacións.