Cáritas abre a súa Operación Quilo para garantir o sustento a 64 familias da Estrada
DEZA
As reservas dalgúns alimentos están a escasear pola alta demanda
01 dic 2022 . Actualizado á 05:00 h.A agrupación estradense de Cáritas acaba de activar a súa Operación Quilo para tratar de facer fronte á elevada demanda local de alimentos. Na actualidade hai 64 familias do municipio que non chegan a fin de mes e que se están vendo obrigadas a facer uso do banco de alimentos de Cáritas. Delas, 33 son usuarias exclusivamente do servizo de repartición de alimentos e 31 son beneficiarias ademais do roupeiro. O servizo de repartición de roupa para vestir, de cama, de aseo ou de calzado conta ademais con outros 87 beneficiarios. En total, Cáritas Parroquial A Estrada está a atender neste momento a 151 familias. A maior parte son orixinarias do propio municipio, pero tamén hai usuarios de concellos veciños —como Forcarei ou Vila de Cruzamentos— e procedentes doutros países. Na actualidade Cáritas aguzosa apoio a 21 familias de orixe marroquí, 32 procedentes de Sudamérica e 19 do este de Europa, todas elas residentes na Estrada.
Debido ao notable número de usuarios, as reservas de alimentos son neste momento limitadas, polo que Cáritas fai un chamamento á colaboración na campaña que este mes levará a cabo nunha decena de supermercados e tendas de alimentación locais. Na Operación Quilo colaboran este ano os supermercados Día, Familia, Froiz e Gadis, así como as tendas de alimentación Artesa, Casa Silva, Chedas, A Santiaguesa, Villa Brasil e Taberna de Ouzande. En canto aos dous últimos supermercados en abrir na Estrada, Lidl de momento non mostrou disposición a participar no programa e Mercadona comprometeuse a pór en marcha outras accións para contribuír activamente co labor social de Cáritas.
A Operación Quilo arrincará hoxe nalgúns establecementos, mentres que noutros comezará dentro duns días. En todos os comercios instalaranse grandes caixas vermellas debidamente identificadas nas que os estradenses poderán depositar durante todo o mes os alimentos que queiran doar. Desde Cáritas informan de que os alimentos máis demandados son aceite, leite, galletas e conservas.
No marco da Operación Quilo, Cáritas nutre tamén a súa reserva de alimentos coas achegas procedentes doutras campañas que levan a cabo en diversos centros educativos, nalgunhas parroquias, na San Silvestre estradense ou en instalacións como a piscina climatizada ou o club de pádel. No entanto, desde a oenegué lembran que, quen prefira contribuír con donativos económicos, poden depositalos na hucha situada na igrexa parroquial ou no local de Cáritas (San Paio, 22). O teléfono de contacto para resolver calquera dúbida ou achegar suxestións é o 617 865 255.
Cáritas tamén axuda ás familias en apertos cubrindo gastos de alugueiro da vivenda —no 2022 abonáronse 50 mensualidades a diferentes familias— ou recibos de luz ou gas. Ademais, atende puntualmente os transeúntes facilitándolles aloxamento ou comida, polo que as achegas económicas resultan cada vez máis necesarias. Neste momento, a oenegué conta con 75 socios, pero serían precisas novas colaboracións para garantir a liquidez e tamén máis voluntarios para afrontar os novos proxectos.