Dous anos de suspensión ao lanzador búlgaro Andreev por dar positivo con estanozolol
DEPORTES
Adrian Andreev, lanzador de martelo de Bulgaria, foi suspendido dous anos por dopaxe. O atleta deu positivo por un esteroide, estanozolol, durante unha proba da Copa de Europa disputada en Novi Sad (Serbia) no mes de xuño pasado. Andreev, de 29 anos, non poderá competir ata xullo do 2008, segundo anunciou Dobromir Karamarinov, representante da Federación Búlgara de Atletismo. «É un atleta afeccionado que non ten adestrador nin médico co que consultar e debe ter tomado algúns suplementos alimenticios que contiñan estanozolol», finalizou Karamarinov. Por outra banda, a Federación Alemá de Atletismo arquivou onte os procesos abertos por sospeita de dopaxe contra o ex campión olímpico de 800 metros, Niels Schumann, e a ex campioa mundial de 400 metros, Grit Breuer. Tampouco será sancionada a vallista Ulrike Urbanski que tamén estaba a ser investigada. A particularidade dos tres casos estaba en que ningún dos atletas dera positivo, senón que a sospeita se baseaba nas actas dun proceso penal contra o ex adestrador Thomas Springstein.