Israr Megantara convence con goles e tamén viraliza ao Burela FS en Indonesia
DEPORTES
O futbolista asiático anotou cinco tantos nos catro amigables que xogou e o Instagram do club multiplica os seus seguidores desde a súa chegada
09 sep 2025 . Actualizado á 23:14 h.Israr Megantara está a aproveitar á perfección a súa primeira estancia en Burela para convencer da idoneidade do seu regreso o próximo mes de febreiro para xogar a segunda parte do campionato, logo de que dispute a Copa Asia co seu país. O pivote zurdo de 20 anos do Cosmo JNE de Iacarta, que veu a terras mariñás para reforzar a pretemporada do equipo laranxa e para ter unha primeira toma de contacto co club, marcou en todos os partidos que disputou e vaise con cinco goles no zurrón. «Cumpriu coas expectativas e deunos o que agardaba del. Adaptouse moi rápido, é un rapaz con ambición, con ganas de crecer, que sabe comunicarse en inglés e para el foi doado adaptarse ao traballo que realizamos porque é moi similar ao que fai no seu club», explica David Rial, o adestrador do Burela FS e gran valedor da súa fichaxe.
O santiagués xa o coñecía á perfección porque en Indonesia diríxeo Motonori Baba, un técnico xaponés co que trabou unha grande amizade cando coincidiron na estrutura doSantiago Futsal: «En xuño estiven quince días con el en Indonesia, paseime por varios adestramentos e a metodoloxía dos dous é moi similar e isto axudoulle sen dúbida a Israr».
O indonesio puido fichar polo Burela FS xa fai un par de campañas, cando xogaba no Bintang Timur Surabaya ás ordes do lucense Diego Ríos, pero o ofrecemento era para moi pouco tempo e por circunstancias refugaron unha oportunidade que agora non van deixar escapar. «Creo que cando volva en febreiro vai ser un máis desde o primeiro día. E vainos a dar desafogo porque é un pivote áxil, que se manexa moi ben de costas, vírase ben cara aos dous lados e, aínda que non é moi corpulento, si que é dominante porque lle gusta o contacto e alí en Indonesia os peches son máis duros, así que o vai a ter máis sinxelo aquí por iso e tamén porque a calidade de pase é superior e vanlle a chegar mellores balóns. Non é un pivote pegador e ten que mellorar na finalización, pero si que se desenvolve moi ben en situacións de área, é técnico e sacrificado en labores defensivos», valora.
Israr arribou a Burela o 29 de agosto e marchará o 16 de setembro tras anotar un tanto de penalti ante o Nun'Álvares portugués, estrearse en Vista Alegre cun gol ante a selección de Kuwait, realizar un dobrete na pista do Troula de Betanzos e resolver con calidade unha acción na área no duelo a domicilio co Gardo.
O club sumou case 1.000 seguidores en Instagram na súa primeira semana
A chegada de Israr supuxo un bum para a conta de Instagram do Burela FS, que na primeira semana do indonesio como laranxa creceu en case 1.000 seguidores, superando a barreira dos 16.000. A media do club sitúase nuns 200 'followers' novos ao mes. O pasado mes de maio, co equipo masculino loitando ata a última xornada pola permanencia en Primeira División e o feminino gañando a Copa da Raíña e disputando o play off polo título, a conta experimentou un crecemento de 405 simpatizantes, que non son nin a metade dos acadados agora en tan só unha semana. O 1 de setembro, día que este diario avanzou a súa chegada a Burela, a conta de Instagram burelista rexistrou 131 novos seguidores, mentres que a xornada seguinte, cando o oficializó a entidade, foron 211, un 557% máis que un día normal.
A nivel de interaccións, cada publicación referente ao equipo masculino énchese de gústasme e comentarios de seguidores do país asiático. O anuncio da súa presenza en Burela, o pasado 2 de setembro, acumula 509.000 visualizacións, máis de 14.900 interaccións e 216 comentarios, unha marca nas redes do Burela FS que incluso bateu este martes cando o club colgou nas súas contas o primeiro gol do futbolista indonesio en Vista Alegre. Esa publicación en Instagram superaba os 70 comentarios e os 7.000 gústasme en menos dunha hora, pasaba de 100 comentarios e 10.000 gústasme na segunda hora e pechaba o martes por amais dos 17.000 favoritos. Para ver a dimensión real do impacto da chegada de Israr ao Burela FS, servir como referencia que a publicación do último ascenso a Primeira División, en xuño do 2024, quedou en 1.529 gústasme.
A súa presenza en Burela tamén se deixou sentir no ránking de seguidores que reúne o club na súa conta de Instagram, superando o país asiático nesta última semana a portugueses, arxentinos, italianos e chilenos. Os indonesios xa son a terceira nacionalidade (3'7%), só por detrás de brasileiros (12'9%) e españois (64'9%).
A clínica focense Maas Saúde renova a súa colaboración coa entidade burelense
A clínica focense Maas Saúde seguirá unha campaña máis colaborando co Burela FS a través dun patrocinio que tamén inclúe controlar o bo estado de saúde dos futbolistas que integran os primeiros persoais dos equipos da entidade facendo as pertinentes revisións médicas a principios de cada tempada.
O presidente do club, José Luis Sáez, acudiu a Foz acompañado da internacional ucraína Sydorenko e do santiagués Alán para formalizar a continuidade do acordo con Marta Saa e Juan Antonio López, xerentes do centro médico e o segundo tamén directivo do club burelense. Sáez agradeceu «a familiaridade e confianza que nos achega esta clínica desde fai tantos anos, así como a implicación e fidelidade de cara ao club, apoiándoo nas boas e nas malas e contribuíndo a proporcionar un servizo tan importante como é a saúde das nosas xogadoras e xogadores», sinalou o mandatario.