Thomas Müller, Son, Vardy, Modric ou De Bruyne, emblemas que cambian de aires tras deixar o club que marcou as súas carreiras
09 ago 2025 . Actualizado á 23:27 h.Cada ano no fútbol prodúcense despedidas emotivas de xogadores que se deixaron a alma polo seu club, pero este verán concentrou moitas partidas sensibles en moi pouco tempo. A máis recente é a do surcoreano Heung-Min Son, que o pasado sábado anunciou a súa marcha do Tottenham tras dez tempadas nas que anotou 173 goles e 101 asistencias en 454 partidos. Son ten xa 33 anos e porá rumbo a Los Ángeles FC, pero ao longo da súa carreira tivo ofertas de equipos que lle ofrecían maiores posibilidades de gañar títulos e aínda así quedou nos Spurs. Finalmente, logrou darlle á súa afección a Europa League, un ansiado título que se fixo agardar máis de trece anos. Con ese obxectivo cumprido, Son pon fin á súa etapa no club ao grande e deixa un legado indeleble.
Outro xogador que o deu todo polo club da súa vida foi Thomas Müller. O alemán estivo 25 anos no Bayern, desde as categorías inferiores ata este verán. Gañou absolutamente todo co seu equipo e varias veces. O máis rechamante son os seus trece Bundesligas e dous Champions, grandes conquistas nas que sempre participou de forma activa. Aínda que estivo eclipsado nalgúns momentos por outros xogadores que tiñan maior imaxe como Arjen Robben, Franck Ribéry ou Robert Lewandowski, Müller sempre era unha segundo espada moi perigoso. Despediuse do Bayern no Mundial de Clubs e, do mesmo xeito que o surcoreano, recalará na MLS, neste caso o Vancouver Whitecaps. Podería ser, sen dúbida, un dos xogadores máis grandes na historia do xigante bávaro, polo que pasaron futbolistas do calibre de Franz Beckenbauer, Gerd Müller ou Oliver Khan.
Unha das historias máis bonitas cun mesmo club é a de Jamie Vardy co Leicester City. Foi fichado polos Foxes en 2012 cando xogaban na segunda división inglesa. O dianteiro inglés estivo presente no ascenso do seu equipo e comezou a brillar aos poucos na máxima categoría. O seu momento álxido chegou en 2016, ano no que foi o máximo goleador do humilde Leicester, que sorprendeu ao mundo gañando a Premier. As estrelas dese equipo marcharon co tempo, pero el aguantou e chegou a ser máximo goleador en Inglaterra, ademais de gañar unha FA Cup e unha supercopa inglesa. O Leicester desinflouse e descendeu ao Championship en 2023, pero Vardy baixouse ao barro e axudou ao equipo para volver á Premier, aínda que este último ano non conseguiu regalarlle a permanencia. Con 38 anos deixa o club dos seus amores con 200 goles en 500 partidos.
Outro que abandonou a liga inglesa foi Kevin de Bruyne, tras marcharse do Manchester City ao Nápoles. O belga foi o creador de xogo de Guardiola, o compás coa que era máis doado gañar encontros e unha das claves polas que un equipo sen moita historia agora ten unha Champions e encadeou seis títulos de liga en oito tempadas. O seu impacto no campo foi tan grande que é o segundo máximo asistente da competición con 121 pases de gol, só por detrás das 168 de Ryan Giggs, pero en case 400 partidos menos. A ausencia do belga será unha das incógnitas da próxima tempada para observar se varía o rendemento do City.
En España tamén hai habido despedidas notables, como as de Saúl Ñíguez e Ángel Correa no Atlético ou a de Óscar de Marcos no Athletic. O caso de Saúl non é tan significativo, xa que as dúas últimas tempadas estivo cedido, pero non deixa de ser o noveno xogador con máis partidos na historia do Atlético, en cuxa canteira ingreso sendo un preadolescente. Correa é o quinto nesta lista e é que ambos son dúas dos futbolistas que mellor representaron a etapa do cholismo, pois lograron gañar unha Liga e unha Europa League. De Marcos é o segundo xogador con máis partidos no Athletic (573), un club que, pola súa filosofía, adoita ter xogadores xeracionais.
Despedidas por e para o Real Madrid A mala tempada do Real Madrid precipitou os cambios no persoal. O máis notable é o do banco, pois Carlo Ancelotti, o adestrador máis laureado do Madrid con 15 títulos, entre eles tres Champions, deixou o club para asumir a dirección da selección brasileira. A pesar de que o italiano se mantivo só tres anos durante a súa segunda etapa na capital, era un dos adestradores máis respectados en España pola súa enorme traxectoria.
Aínda que o gran baleiro nos corazóns do Madrid deixouno Luka Modric, que se despediu o mesmo día con 28 títulos ás súas costas, que converten ao croata no futbolista máis laureado coa camiseta do club máis laureado do planeta. Xogou un total 597 encontros, sendo o oitavo con máis partidos e o máis veterano en xogar co equipo de Chamartín ao facelo aos 39 anos.
Para chegar ao Madrid, Alexander-Arnold despediuse entre bágoas do club que o viu crecer, o Liverpool. O novo xogador branco pode presumir de ser un dos laterais máis icónicos da Premier a unha temperá idade. No seu palmarés colleita unha Champions, con aquela brillante asistencia contra o Barcelona en 2019. Ademais, suma dous títulos na Premier League e 354 partidos cos 'reds'. Ningún outro xogador na súa liga será capaz de lucir tan ben o dorsal '66' como el o fixo no Liverpool.