O club azulgrana percibirá ao redor de 40 millóns por catro tempadas e os seus equipos profesionais lucirán o emblema «RD Congo - Coeur de Afrique» nas súas camisetas de adestramento
30 jul 2025 . Actualizado á 18:45 h.Fíxose agardar, pero o Barcelona anunciou este mércores o acordo con Goberno da República Democrática do Congo (RDC) para o próximos catro cursos. Aínda que non se anunciaron oficialmente as cifras do contrato, serán ao redor de 40 millóns de euros, 10 por tempada. Unha importante inxección económica para a entidade que preside Joan Laporta, sobre todo para poder inscribir as súas fichaxes deste verán, co porteiro Joan García á cabeza.
A partir de agora, todos os equipos profesionais do club lucirán o emblema «RD Congo - Coeur de Afrique» na parte posterior das súas camisetas de adestramento ata a 2028-2029 e este país converterase en patrocinador global, coa denominación de «Partner oficial para o empoderamento no deporte e a cultura». Ademais, o Spotify Camp Nou acollerá a Casa da RDC nas súas instalacións.
Á marxe de obter uns ingresos económicos moi necesarios para o Barça, esta vinculación estratéxica ten o obxectivo de promover o fútbol e a cultura do deporte e a paz. «Representa un compromiso compartido por fomentar o desenvolvemento polideportivo dentro da RDC e, como parte desta colaboración, o club contribuirá a enriquecer a formación dos mozos deportistas do país mediante a transmisión do seu ecosistema de valores, un piar indiscutible do modelo e o estilo Barça», explica o comunicado que emitiu o Barça.
A través das súas academias, a entidade azulgrana comprométese a crear e desenvolver un programa de actividades deportivas destinado aos nenos da rexión en diferentes disciplinas: fútbol, baloncesto, balonmán, fútbol sala e hóckey patíns. Paralelamente, desde o Barça Innovation Hub (BIHUB), desenvolveranse programas específicos para adultos, para a educación de adestradores baseados na formación técnica avanzada, estruturación deportiva por idades, integración da ciencia deportiva e organización conxunta de deportes.
Fortalecer lazos
Así mesmo, este acordo tamén terá presenza no futuro Espai Barça, xa que se creará a Casa da RDC nas novas instalacións do Spotify Camp Nou. Trátase dunha exposición inmersiva que recibirá aos visitantes do dstadio para mostrar a diversidade cultural e a tradición deportiva da República Democrática do Congo, co obxectivo de fortalecer os lazos con este país de África Central. Esta alianza estratéxica entre o Barça e o Congo non é unha fórmula nova para o goberno deste país africano, que xa mantén acordos similares con outros importantes clubs europeos como o Milan e o Mónaco.