Casas Novas acolle o certame ata o domingo e a proba de velocidade e manexabilidade dará a puntuación basee
15 jul 2025 . Actualizado á 21:20 h.Todo está listo no Centro Hípico Casas Novas para dar comezo á primeira xornada do Campionato de Europa de Saltos Longines FEI, que se celebrará desde este mércores ata o domingo neste recoñecido enclave galego, punto de referencia para a hípica internacional.
Onte os 90 cabalos rexistrados pasaron a inspección veterinaria, un procedemento obrigatorio neste tipo de competicións que garante que todos os equinos están en plenas condicións para saltar sen ningún risco. Ao longo da mañá do martes, os equipos nacionais realizaron a revisión xeral de saúde, verificación de identidade, control de vacinas e avaliación do trote de cada cabalo, sen incidentes notables. Unha vez finalizada a inspección, os binomios aproveitaron para realizar unha toma de contacto na pista principal de Casas Novas, xa preparada para recibir aos mellores cabalos e xinetes de Europa.
Tras superar este trámite, finalmente serán 89 binomios os que loitarán polo ouro europeo: 18 competirán de forma individual e o resto formarán parte de 18 equipos nacionais. Onte celebrouse o sorteo da orde de saída, determinando que Portugal será a primeira nación en abrir pista, encabezando a primeira saída a pista dos 89 binomios que saltarán ao longo da tarde desta xornada inaugural.
O campionato arrincará este mércores ás tres da tarde co Checkpoint Trophy, unha proba de velocidade e manexabilidade con alturas de 1,50/1,55 metros. Esta proba é unha caza. Trátase dunha proba contra reloxo na que cada derriba non penaliza con puntos de falta, senón que engade segundos ao tempo total do percorrido (habitualmente 4 segundos por obstáculo derrubado). Isto significa que os xinetes deben atopar o equilibrio perfecto entre a velocidade e a precisión, buscando un percorrido limpo e fluído que lles permita escalar posicións na clasificación xeral.
O resultado desta proba é crucial, xa que serve como puntuación basee para as xornadas seguintes, tanto na clasificación individual como por equipos. É, por tanto, unha primeira toma de contacto que pode marcar a diferenza para aspirar ao podio europeo. Ademais, no marco do Checkpoint Trophy, entregarase o NH Collection Additional Trophy ao xinete español mellor clasificado, premiando o talento nacional nesta gran cita continental.
O público asistente poderá gozar desta xornada inaugural que reunirá os binomios máis destacados do momento, nun campionato que actualmente ostenta o equipo sueco e que promete ofrecer espectáculo de máximo nivel. Casas Novas volve posicionarse como un dos epicentros da hípica europea, acollendo unha competición que, sen dúbida, deixará momentos inesquecibles.