O xa excapitán e o club retomarán as conversacións para estudar a súa continuidade unha vez finalice o proceso de recuperación da lesión de boneca que arrastra
14 jul 2025 . Actualizado á 15:07 h.O Leyma Básquet Coruña anunciou este luns que o base e capitán murciano Álex Hernández non continuará no club de para a próxima tempada, despois de catro anos históricos nos que o club laranxa conseguiu da súa man ascender á máxima categoría do baloncesto español.
Na pasada campaña o xogador murciano tan só puido disputar 6 partidos, promediando 3.42 minutos, 0,7 puntos, 0,5 rebotes, 0,2 asistencias, 0,2 recuperacións e 0,7 de valoración. A tempada rematou antes de tempo para o capitán laranxa ao ter que someterse a unha operación pola rotura do ligamento da súa boneca esquerda.
Así mesmo, o club comunicoulle ao xogador o seu desexo de explorar opcións para que continúe formando parte da estrutura da entidade, e con este fin ambas as partes acordaron retomar as conversacións unha vez finalice a súa recuperación tras a lesión de boneca sufrida na tempada pasada.
«Álex foi une excelente capitán, un inmellorable modelo para a canteira e a afección, sempre defendeu o noso escudo con enorme entrega e encarna á perfección os valores do club, polo que desexamos seguir contando con el nun futuro non moi afastado», engade o comunicado.
Coa saída de Álex Hernández, xa excapitán laranxa, tan só quedan dous xogadores por resolver o seu futuro co Básquet Coruña; o barcelonés Aleix Font e o xeorxiano Beqa Burjanadze.
Actualmente o conxunto coruñés conta en persoal con cinco xogadores, todos eles novas incorporacións. O primeiro en chegar foi a á-pivote cubano Yoanki Mencía, e a el sumáronse o pivote senegalés Abdou Thiam, que volve á Coruña tras tres anos no Tizona Burgos, o aleiro madrileño Jacobo Díaz, o base brasileiro Caio Pacheco e o base catalán Didac Cuevas.
Tamén houbo cambios no banco xa que, tras a marcha de Diego Epifanio ao Obradoiro, será Carles Marco o encargado de tomar a batuta durante a tempada 2025-2026 en Primeira FEB.