A arousá vence a Sofia Kenin en dous set, iguala a súa mellor marca no torneo inglés e pode ser a primeira galega en acadar os oitavos
03 jul 2025 . Actualizado á 20:58 h.Jéssica Bouzas superou a estadounidense Sofia Kenin na segunda rolda de Wimbledon por 6-1 e 7-6. A arousá foi dominadora dun duelo que se complicou ao final do segundo set e está a un paso de seguir deixando a súa pegada na historia do deporte galego.
A tenista de 22 anos, que xa vencía no debut cando o seu rival Ela Seidel marchou lesionada, acada por segunda vez consecutiva a terceira rolda do torneo inglés. Así, bate de novo a marca de Lourdes Domínguez en Londres, que ata o pasado ano era a única galega en acadar o segundo partido.
Buscará mellorar a súa actuación do pasado ano, cando marchou lesionada a pesar de eliminar en primeira rolda á eslovaca Markéta Vondrousova (vixente campioa).
Bouzas enfrontarase á ucraína Dayana Yastremska, número 42 do ránking WTA, nun partido que en principio disputarase o sábado. Trátase dunha tenista contra a que nunca xogou e que tivo que remontar ante Anastasia Zakharova para pasar de rolda (5-7, 7-5 e 7-6).
É a cuarta vez que a galega chega ao terceiro partido nun grand slam, despois de logralo unha vez en Roland Garros, unha no US Open e outra precisamente na pasada edición en Londres.
Djokovic arrasa nun bo día para os españois
Djokovic venceu sen dificultades en tres set a Daniel Evans, nun día en que Alejandro Davidovich superou por 6-1, 4-6, 6-3 e 7-6 ao neerlandés Botic Van de Zandschulp, unha vez foi renovado o seu partido aprazado o día anterior.
O malagueño enfrontarase a Taylor Fritz en terceira rolda, á que tamén accedeu o mallorquino Jaume Munar tras derrotar en tres set a Fabian Marozsan por 6-2, 6-3 e 7-6). Pola súa banda, Pedro Martínez liquidou por 7-5, 7-5 e 7-6 o seu partido ante o arxentino Mariano Navone.