Antonio Benito, pupilo de Pablo Dapena e Policía Nacional en Lugo, encadea en Pontevedra o seu segundo título mundial de tríatlon longo
DEPORTES
O manchego, veciño da cidade da muralla desde hai oito anos e deportista do Fluvial, impúxose con autoridade na meta do Centro Galego de Tecnificación Deportiva. A francesa Marjolaine Pierré repetiu a súa vitoria o 2023 sen rival desde o segmento de bicicleta
29 jun 2025 . Actualizado á 17:14 h.Campión por esmagamento. Antonio Benito (Tomelloso, Ciudad Real, 1994) revalidou á primeira hora da tarde deste último domingo de xuño o título de campión do mundo de tríatlon de longa distancia que un ano atrás conquistaba na cidade australiana de Townsville. O deportista manchego, subcampión mundial no 2023 en Eivissa e desde hai oito anos veciño de Lugo, onde exerce de axente da Policía Nacional e compite con licenza do club local, o Fluvial, respondeu as expectativas que recaían nel na gran cita disputada en Pontevedra. Ante os ollos do seu adestrador, o pontevedrés Pablo Dapena, subcampión da mesma proba que no mesmo escenario encumbraba no ano 2019 a Javi Gómez Noya como o mellor da especialidade nun histórico dobrete galego, cruzou a liña de meta do Centro Galego de Tecnificación Deportiva en 5 horas, 33 minutos e 33 segundos. O campión volvía coroar, esta vez, ante os ollos do seu pai e na cidade onde vive a súa parella e tanto adestrou.
Antonio Benito liderou case a totalidade da proba dos 3.000 metros a nado, os 120 quilómetros e bicicleta e os 30 de carreira a pé, sobrevivindo como ningún outro ás durísimas condicións meteorolóxicas, cunha temperatura de inicio de 22 graos na saída á auga fronte á ponte dos tirantes e un 88 por cento de humidade ambiental, disparándose o termómetro por amais dos 30 cando os atletas se baixaron das bicicletas para botar a correr.
Outro español, o barcelonés Guillem Montiel, pareceu querer disputarlle o dominio ao seu compatriota nun brillante segmento ciclista onde deu a súa mellor versión, demarrando na terceira e última das voltas e logrando unha vantaxe de máis de dous minutos sobre Benito e o francés Casimir Moine na segundo e última das transicións do tríatlon. O belga Tom Vaelen, integrante do cuarteto que dominou a carreira tras a saída do río Lérez, quedaba xa atrás.
Ao final da primeira das catro voltas ao circuíto de carreira a pé, Benito adiantou a Montiel. Os problemas físicos cos que chegou a Pontevedra o vixente campión de Europa de media distancia custáronlle pouco despois o seu abandono, coa atmosfera infernal pola calor e a humidade extremas acabando de pechar a pinza sobre Montiel.
A partir de aí, Benito colleu a cabeza da carreira, para non deixar de incrementar a súa vantaxe sobre os perseguidores que se sucederon no segundo posto. Porque foron varios os que acabaron moi lonxe de onde se lles presupuña xa no último terzo de carreira, como o belga Vaelen, que durante moito tempo pareceu encamiñarse como mínimo cara á prata, desfalleciendo para ser superado por outros aspirantes con menos fol de inicio finalizando décimo. Ou o francés Moine, que houbo de sumarse a Montiel no capítulo de retiradas.
A potencia e o aguante de Benito permitiron gozar na última volta do tramo final de dous quilómetros e medio de carreira a pé polo fermoso casco antigo de Pontevedra. Atrás, o sufrimento dun trazado rompepiernas, con subidas e baixadas, e cambios de firme, entre o asfalto e a terra, baixo un sol de xustiza. Andando os últimos cinco metros, o manchego afincado en Lugo permitiuse o lujazo de pararse a estreitar mans alén dos valos da recta final cara á meta no CGTD, e collendo a cinta de chegada coas dúas mans, dar un brinco no aire xa cruzado ao lado da gloria dun bicampión do mundo. Sete minutos e 19 centésimo houbo de agardar Benito para ver ao segundo triatleta do podio, o francés Dylan Magnien (5.40,52). O británico William Draper pechou o medalleiro masculino cun crono de 5.41,12.
«Gañar aquí é moi especial, porque Pontevedra é como a miña segunda casa»
«Gañar en Pontevedra é moi especial. Pontevedra é como a miña segunda casa», declarou Antonio Benito poucos minutos despois de finalizar a proba e antes de subirse ao podio para recibir o seu ouro. E é especial porque, enumerou: «A miña parella vive aquí. Paso moito tempo aquí. Pablo (Dapena, o seu adestrador) e Javi (Gómez Noya) foron prata e ouro no Mundial aquí no 2019. E veume a ver o meu pai». Benito destacou que «sen o apoio de todos eles sería imposible que conseguise isto. Esta carreira vai por vós». O manchego, axente de Policía Nacional en Lugo, mandou desde meta «un abrazo grande a toda a comisaría, aos meus compañeiros de quenda en especial, e aos meus compañeiros na Academia da Policía Nacional de Ávila».
Paseo triunfal de Pierré
E se incontestable foi a vitoria de Antonio Benito na proba masculina, de escándalo resultou o triunfo da francesa Marjolaine Pierré. Unha das grandes favoritas, que como Benito, xa é bicampioa do mundo, no seu caso, tras gañar na edición planetaria do 2023.
Sorprendeu a británica Chloe Sparrow cunha actuación superlativa no segmento a nado, saíndo da auga con dous minutos de vantaxe sobre a bielorrusa Maksimava. Pero Pierré apenas necesitou uns quilómetros do trazado ciclista para pasar á británica e marcarse unha contrarreloxo contra si mesma en formato dúatlon, para gañar en 6 horas, 15 minutos e 50 segundos. No seu caso, tendo que agardar a coñecer á súa primeira compañeira de podio 11 minutos e 22 segundos, os que a separaron da polaca Marta Lagownik (6.27,12). Outra francesa, Charléne Caravel, colgouse o bronce, en 6.30,48.