O Espanyol de Manolo González púxolle suspense ata a segunda metade, pero os goles de Puado e de Pere Milla déronlle a permanencia na elite
24 may 2025 . Actualizado á 22:32 h.Durante 65 minutos estivo zozobrando o Espanyol, medorento de non ser capaz de derrubar a resistencia do As Palmas e acabar en Segundo polos seus propios deméritos. Foi o tempo que tardou Puado en coller o balón, encarar os once metros e marcar o 1-0 que afastaba as pantasmas de Cornellà.
Nese momento do delirio perico, o Leganés abusaba con comodidade dun Real Valladolid que leva meses dando pena. Os de Borja Jiménez gañaban por un cómodo 3-0, con goles todos eles conseguidos na primeira metade (Javi Hernández no minuto 24, Diomandé no 36 e Juan Cruz no 40). Incluso, Cisse vira como lle anulaban outro tanto por fóra de xogo.
O Espanyol, dirixido polo galego Manolo González, chegara á xornada 32 practicamente salvado, ao contar con 38 puntos e ter por diante sete partidos. Pero os cataláns relaxáronse en exceso e metéronse na lea sen agardalo.
Ao gol de Puado seguiulle o tranquilizador de Pere Milla, no 82, que converteu en trámite os minutos finais, ante a decepción de Butarque. O partido do Leganés rematou antes, pois só houbo un minuto de engadido, así que houbo tempo a dixerir o descenso sobre o céspede, mentres concluía Cornellà.
O equipo madrileño regresa, deste xeito, a Segunda División, tan só un ano despois do seu ascenso. Foi unha tempada repleta de altibaixos, na que pagou o feito de lograr só un triunfo entre as xornadas 21 e 34. De nada valeulle imporse en tres dos catro últimos duelos.
O exentrenador do Deportivo e do Rápido de Bouzas fracasou no seu intento de salvar a un equipo que non atopou a regularidade necesaria.