O campión do mundo, actualmente de baixa por lesión, ten unha cláusula que lle liberaría do seu contrato coa marca italiana a finais do 2025
12 may 2025 . Actualizado á 15:49 h.Non se pode dicir que a relación entre Jorge Martín e Aprilia fose un camiño de rosas, desde que ambos uniron os seus camiños de xeito atropelado hai agora un ano. O desexo do piloto madrileño por aquel entón era recalar na estrutura oficial de Ducati, pero finalmente elixiron a Marc Márquez.
E antes incluso de que se anunciase aquel acordo, a noite do domingo posterior ao Gran Premio de Italia, Martín xa selara o seu futuro en Aprilia, nun contrato de dúas tempadas que debía converter ao piloto de San Sebastián de los Reyes na referencia absoluta do proxecto da marca de Noale.
Con todo, aquel acordo tiña unha vía de escape, como agora adiantou o portal Motorsport.com. Se nas seis primeiras carreiras da tempada, a Aprilia non conseguía unha serie de resultados, o piloto quedaría libre para elixir destino no 2026. A día de hoxe, os resultados da moto italiana non están a ser os agardados.
O quinto posto do rookie Ai Ogura, que corre na estrutura satélite, na carreira inaugural de Tailandia é o seu mellor resultado ata a data. Mentres que o compañeiro de box de Martín, Marco Bezzecchi, non pasou o quinto posto e marcha duodécimo nunha xenerala onde os cinco primeiros son pilotos Ducati. E na clasificación de construtores, Aprilia é a última clasificada, por detrás de Honda, KTM e Yamaha, cando en teoría debía ser o ano para ser a alternativa a Ducati.
Estando todos estes números sobre a mesa, non se pode obviar que Jorge Martín apenas estivo presente nun só gran premio dos seis que se disputaron, e nin sequera puido participar na pretemporada, pola sucesión de lesións que arrastrou desde o inicio de ano. Caeu no primeiro día de test en Malaisia, despois volveu pasar polo quirófano xusto antes de empezar o curso por outra caída nun adestramento privado nun karting de Lleida.
E o peor estaba por chegar, cando tivo o gravísimo accidente na carreira do Gran Premio de Catar, onde a moto de Fabio Di Giannantonio impactoulle estando no chan e provocoulle un neumotórax e once fracturas costais das que aínda se recupera.
Ultimato
Durante a fin de semana coñeceuse que Jorge Martín estivera o venres onda o seu equipo. O madrileño viaxara en coche desde Andorra, onde reside, ata Le Mans, pero non houbo ningunha comparecencia pública nin se viu ao piloto polo paddock. O que parecía que era un encontro amigable para facer equipo e motivar ao proxecto, era en realidade unha visita de traballo, onde o piloto comunicou a Aprilia as súas intencións de facer efectiva esa cláusula liberatoria.
Como é evidente, a noticia caeu como un xerro de auga fría dentro da fábrica de Noale, que non ten a intención de deixar escapar ao piar do seu proxecto en moto GP. Segundo informa o mencionado portal web especializado en motor, Martín está disposto a ampliar o prazo de rendemento en seis carreiras máis desde que reapareza en pista, algo que agarda para despois do verán.
Aprilia non lle vai a pór doado a súa posible saída e consideran que esa cláusula non tería validez estando lesionado o seu piloto durante un período prolongado. Como é de supor, o ambiente estará moito máis enrarecido a partir de agora e ata que dure a relación entre ambas as partes, no 2026 como pretende o piloto, ou no 2027, como está escrito no contrato.
O futuro de Jorge Martín podería estar enfocado cara a Honda, que terá unha praza libre a próxima tempada se non renova a Luca Marini. A fábrica xaponesa poría moito diñeiro sobre a mesa para atraer ao piloto de San Sebastián de los Reyes. Pero non só habería unha oferta económica, tamén estaría a aposta deportiva, xa que o xigante das dúas rodas está en plena reconstrución despois de perder a Marc Márquez e xa ve os brotes verdes na súa nova moto GP.
Sen ir máis lonxe, o piloto satélite Johann Zarco gañou a pasada carreira de Le Mans, en auga, si, pero Honda xa era segundo no campionato de construtores antes desa vitoria. Avecíñase culebrón Marín-Aprilia á vista.