O CSD estima o recurso do Barcelona sobre Dani Olmo e Pau Víctor, que seguen rexistrados
DEPORTES
O estamento que preside José Manuel Rodríguez Uribes considerou nulo de pleno dereito o acordo da Comisión de Seguimento
03 abr 2025 . Actualizado á 17:38 h.O Consello Superior de Deportes (CSD) estimou este xoves o recurso de alzada presentado o pasado 7 de xaneiro polo Barcelona e os seus futbolistas Dani Olmo e Pau Víctor, polo que as licenzas de ambos os xogadores continúan en vigor.
O organismo que preside José Manuel Rodríguez Uribes non entrou a valorar o control económico exercido pola liga, pero considerou nulo de pleno dereito o acordo da Comisión de Seguimento do Convenio de Coordinación RFEF-LaLiga por carecer esta de competencia para denegar o visado previo e a licenza federativa dos futbolistas, como fixo a principios de xaneiro.
«Con esta resolución, ambos os xogadores manteñen a súa licenza en vigor. Isto é así porque a Real Federación Española de Fútbol (RFEF) recoñeceu, así mesmo, nas súas alegacións que «non existe ningunha resolución federativa que acordase a cancelación das licenzas», circunstancia esixida pola propia RFEF na súa resolución do 30 de xuño do 2022, afirma o fallo do CSD.
O mesmo engade que «a carreira profesional de Dani Olmo e Pau Víctor estivo protexida desde o pasado 8 de xaneiro pola medida cautelar urxente que concedeu o CSD co único interese de evitar un dano irreparable ata a resolución deste procedemento».