O técnico branco está moi satisfeito tras superar con fartura dous duros partidos contra o Manchester City e o Barcelona
22 abr 2024 . Actualizado á 09:20 h.Carlo Ancelotti é un dos principais vencedores do Real Madrid nesta semana. Tras un partido moi duro contra o Manchester City, o conxunto branco completa a súa semana de gloria cunha agónica vitoria fronte ao Barcelona que lle deixa medio título de Liga en bandexa.
«Foi unha semana moi esixente pero inesquecible», afirmaba Carlo Ancelotti no micrófono de Real Madrid Televisión. O técnico italiano destacou parte final dos seus xogadores no partido xa que para o adestrador branco foi un partido moi loitado e moi competido que se decantou coa última gota de suor para marcar o terceiro.
Con esta vitoria, o Real Madrid colócase con 11 puntos de vantaxe sobre o conxunto azulgrana á falta de seis xornadas para o final do campionato ligueiro. «É un paso moi importante para conseguir esta Liga», explicaba Ancelotti en rolda de prensa.
Este encontro estivo marcado polo gol pantasma de Lamine e o penalti de Lucas Vázquez, discutido polo conxunto azulgrana. Para Ancelotti non foi gol porque «non hai unha toma clara onde o deixe claro» e o penalti provocado polo lateral galego é bastante claro para o italiano.
Unha das sorpresas do partido no combinado branco foi o cambio de Vinicius no minuto 82. O atacante brasileiro víuselle enfadado por iso ao que Ancelotti en rolda de prensa quixo deixar resolto o asunto. «A Vinicius non lle gustou o cambio, quería seguir xogando, pero era necesario meter pernas frescas».
O técnico branco tamén quixo enxalzar a figura de Lucas Vázquez. «É un xogador moi importante. Hoxe marcou a diferenza, como fixo noutros partidos», concluíu en rolda de prensa.