A floretista do club vigués A Oliveira intentará por cuarta vez estar nuns xogos
31 mares 2024 . Actualizado ás 05:00 h.A tiradora do club vigués A Oliveira María Mariño disputará o seu cuarto preolímpico co obxectivo de conseguir praza para os Xogos de París, un obxectivo do que quedou ás portas as ocasións anteriores. A Real Federación Española de Esgrima fixo pública este venres a lista de seleccionados para a cita que terá lugar en Luxemburgo os días 27 e 28 de abril.
«A ver se esta vez, consegues o que se che negou en anteriores preolímpicos. Lembramos especialmente o último preolímpico de Madrid, onde tocou a praza olímpica cos seus dedos, e cedeu na final ante a polaca», podíase ler nas redes sociais da Oliveira. Tamén avanzaban que será cabeza de serie número 4, á parte de explicar que «está a adestrar a lume de biqueira para chegar en óptimas condicións a este evento».
Mariño comentaba a La Voz hai unhas semanas que o preolímpico no que aspiraba a estar é unha competición moi dura, pero que está nun bo momento e pelexará ata o final por ser olímpica. Ten claro que non conseguilo non sería un fracaso. «O fracaso é non loitalo, pero no deporte, estar na pelexa non o é», sostén a tamén psicóloga, que adestra en Italia con Luca Simoncelli