A primeira xornada dos internacionais da Coruña finalizou coa vitoria do británico con Billabong du Roumois
02 dic 2023 . Actualizado ás 05:00 h.Emoción ata o final no trofeo CaixaBank, proba de 1,50 metros do CSI5*-W da Coruña, clasificatoria para disputar mañá o Gran Premio Longines FEI da Copa do Mundo. Dos 44 binomios que iniciaron a proba, 28 xa estaban clasificados, polo que había pendentes doce prazas. Os xinetes españois tiñan todos asegurada a súa participación, menos Jesús Bamonde.
Os xinetes franceses, que coparan as dúas primeiras prazas da proba anterior, estaban dominando tamén o trofeo CaixaBank. Julien Epaillard lideraba a táboa con Cancun Torel Z. O seu tempo de 56,03 parecía imposible de rebaixar. Neses momentos, outro francés ocupaba o segundo posto: Julien Anquetin con Blood Diamond du Pont, con 56,42 segundos.
Cando parecía que o triunfo francés está sentenciado, o mozo Harry Charles, líder do ránking FEI Ou-25 durante os 23 últimos meses, saíu disposto a gañar a proba con Billabong du Roumois, o fillo de Mylord Carthago co que gañara esta proba no 2022 e que, curiosamente, con anterioridade concursara Julien Epaillard.
O británico e o seu alazán pararon o crono en 55,64 segundoss, rexistro que lles permitía facerse por segundo ano consecutivo co triunfo. O público, que desde primeira hora da tarde encheu as bancadas do Centro Hípico Casas Novas, premiou ao británico cunha longa ovación mentres recibía o seu trofeo de mans de Juan Pedro Badiola, director territorial da zona norte de CaixaBank. No 2022 gañara tras mellorar o rexistro de Henrik von Eckermann e un ano despois fíxoo deixando ás portas da vitoria a Julien Epaillard.
Fumero, primeiro triunfo español
José Fumero e Figuier du Roc foron os máis rápidos no Trofeo NH Collection, proba de 1.40 metros, que foi disputada por dezanove conxuntos.
A primeira proba grande do CSI1* tivo dominio español, con tres representantes da nosa hípica entre os catro primeiros clasificados. Fumero e o tordo de Yeguada Villafranca xa foran gañadores dunha proba do CSI1* coruñés na tempada 2021, cando o fillo de Upsilon só tiña 6 anos, pero xa daba mostras da súa competitividade.
Jose Fumero e Figuier du Roc remataron en 20,62 segundos a segunda fase do trazado, logrando rebaixar os 21,20 segundos que ata ese momento permitían a Javier González Fraga e Tik Tak de Pravia liderar a clasificación. O xinete galego, de novo entre os mellores nunha proba co fillo de Action Breaker, tívose que conformar nesta ocasión co segundo posto.
Svea Tegnestedt, foi tamén dos destacados. A sueca ocupou o terceiro posto con Palina Keeps ZL, mentres que con Purple Rain ZL, co que pechou a proba, cometeu unha derriba no último obstáculo cando concluíra co mellor tempo. Unha derriba que lle levou ao oitavo posto.
Victoria portuguesa
O Trofeo Inaugural abriu a primeira xornada, con algo máis dunha vintena de participantes, dos que só sete conseguiron finalizar o seu percorrido sen penalizacións. Cando todo parecía indicar que a presente edición se iniciaría a ritmo mexicano, coa amazona afincada en España, Ángela González Muñoz, a proba decantouse por un gañador portugués. Ángela González Muñoz e Jay Jay É, un nove anos con moita experiencia en probas de mais altura, pararon o cronómetro en 62,50, mentres que o xinete portugués Luis Alexandre Dolgner conseguiu rebaixar o seu rexistro ata 62,07. Fíxoo con Sig Black Panther, un westfaliano de 12 anos, fillo de Kannan, co que chegou a Casas Novas tras ter feito a pasada fin de semana un bo concurso en IFEMA Madrid Horse Week.
O terceiro posto foi para un xinete galego, Adrián Fernando Arenas, que realizou o seu percorrido en 69,43 segundos. Fíxoo con Laville, unha egua de 7 anos que o seu propietario, Diego Ramos Maneiro, importou con só un.
Jesús Bamonde estréase» no Gran Premio Copa do Mundo
«Encantaríame volver gañar, pero hai que ser conscientes de que estamos nun concurso da Copa do Mundo», comenta o coruñés Jesús Bamonde, que di estar vivindo un soño como xinete.
Un soño no que conta como compañeiro a AGR Trouble Maker, o único cabalo co que disputa o CSI5*W A Coruña. É un cabalo de deporte español de 9 anos, ao que monta desde poldro e que, segundo o xinete coruñés, ten un comportamento que garda relación co seu nome. «Desde poldro sempre foi un cabalo especial, moi arisco, nervioso, hai que entendelo. Púxenlle ese nome un pouco de bobada, pero o certo é que se trata dun cabalo con moito temperamento».
Bamonde vive a competición coa enorme satisfacción que lle produce estar a competir ao máis alto nivel na súa cidade e no centro hípico no que habitualmente monta.