Arte e Movemento de Cee arrasa no Mundial de bailes caribeños con seis campións e catorce medallas máis
DEPORTES
O club deportivo despuntou en Macedonia do Norte. «Foron dous meses e pico moi fortes de preparación», di a profesora, Graciela Toba
08 novs 2023 . Actualizado ás 18:17 h.Dezaoito metais nun Mundial. Os representantes do club Arte e Movemento de Cee superáronse con fartura no campionato de bailes caribeños celebrado esta semana en Macedonia do Norte. Acudiron catorce deportistas da Costa da Morte e dúas de fóra adestrados, así mesmo, pola ceense Graciela Toba. O resultado foi de seis ouros, cinco pratas e sete bronces. Moitos máis postos houbo destacados: cuartas, quintas, sextas, etcétera sitúes de entre grupos de 60 persoas.
Na entidade, unha vez rematadas as probas o martes á noite, aínda non llo crían. Este mércores estaban afónicos, «esnaquizados», pero, sobre todo, «moi contentos e entusiasmados». Tamén, en certo xeito, «sorprendidos», confesou a súa profesora. E é que o ano pasado, os deportistas comarcais fixeron soar por vez primeira o himno español nun Mundial de bailes caribeños. Lograsen catro ouros e mesmo número de pratas. Este 2023, na que foi a segunda participación para moitos, pois Toba xa acudiu máis veces con outros atletas sen ser da zona, incrementaron os éxitos.
«Fixémolo ben e gústalles o noso estilo. Había moito máis nivel, con países como Polonia, Eslovaquia ou República Checa, que creceron», afirmou a adestradora.
Estes mozos están a situar a España no mapa internacional desta modalidade, que se corresponde , principalmente, co merengue, a bachata e a salsa. Neste sentido, Italia e Turquía sempre dominaron. Seguen facéndoo, pero, agora, cun importante adversario.
«Este ano, dende a International Dance Organization xa se interesaron por nós en tema de datas de cara ao 2024», trasladou a adestradora.
Os representantes comarcais supuxeron practicamente a metade do equipo español, que estivo capitaneado, así mesmo, por Graciela, que tamén preside a federación galega de baile deportivo.
Moitas horas de preparación
Foron moitos os ingredientes da pócima secreta. O fundamental pasou pola preparación «moi dura», recoñeceu a mestra: «Levamos dende finais de agosto a tope con isto. Foron dous meses e pico moi fortes, de eu acabar a diario case ás dúas da madrugada, e de Serena, a miña filla de 9 anos, adestrar cinco xornadas á semana a un ritmo de catro horas diarias». Son só algúns exemplos. Moitos suman xa un bo tempo ligados a esta disciplina coa entidade ceense. Serena Díaz «cun ano bailaba merengue, con dous empezou ás clases, e con catro iniciouse na competición. Encántalle».
Doutra banda, estes bailaríns presentáronse a numerosas especialidades, algo que non é habitual. «Pero eu son das que pensa que canto máis fas, máis es capaz de facer», asegura a profesora, quen engade: «Son os froitos do traballo na pandemia. Nós nunca paramos. Seguimos con formación en liña». É outro dato a ter en conta.
Estes resultados permitiranlle a algúns ser recoñecidos deportistas galegos de alto nivel, unha distinción que lles interesa por tema de bolsas e outras cuestións. A gran maioría son de Cee, pero tamén os hai de Fisterra , Zas, Camariñas e Santa Comba (e Canarias). «Non sabemos se se repetirá este momento», concluíu.
Os METAIS, UN A Uno
Ouros
Raúl e Serena (salsa couple children)
Raúl e Serena (merengue couple children)
Raúl e Serena (bachata dúo children)
Raúl e Serena (salsa dúo children)
Juanma e Aurora (merengue couple adulto 2)
Laura e Mélani (bachata dúo adulto female)
Pratas
Raúl e Serena (bachata couple children)
André e Inés (bachata dúo júnior 1)
André (bachata só children)
Alba e Ashley (bachata dúo júnior 2)
Juanma e Aurora (salsa couple adulto 2)
Bronces
Serena (bachata só children female)
Raúl (salsa só children masculino)
André e Inés (bachata couple júnior)
André e Inés (salsa dúo júnior 1)
Juanma e Aurora (bachata couple adulto 2)
Melani e Laura (salsa dúo adulto)
Grupo A Rosalía (caribbean show dance adulto)