O francés, un habitual da cita coruñesa, agarda seguir cultivando novos éxitos durante esta fin de semana
14 jul 2023 . Actualizado ás 21:29 h.Julien Epaillard converteuse o xinete máis gañador do circuíto internacional durante o ano 2022. O xinete francés levantouse á cima da clasificación tras lograr nin máis nin menos que 75 triunfos no pretérito ano. A súa serie mantívose ao longo deste ano cultivando unha boa liña de resultados, a pesar de non contar xa coa egua Caracole da Roque. Julien Epaillard volve competir estes días en Casas Novas, nunha pista que coñece ben e na que agarda obter grandes éxitos novamente.
«Si teño moi bos recordos deste concurso da Coruña, aquí gañei o meu primeiro gran premio de 5*, aínda que foi no concurso indoor de inverno. Pero non levo a conta de cantas veces competín aquí e moito menos, de cantas probas gañei en Casas Novas. É un concurso no que normalmente teño bos resultados e agardo que siga así este ano».
—Un xinete tan gañador como vostede, nace ou se fai?
—É complicado, fan falta bos cabalos e experiencia. É algo que se constrúe cos anos e co tempo aprendes a gañar.
—Acaba de imporse con Donatello D'Auxe nun gran premio de 495.000 euros para o gañador. Estamos ante un novo crack?
—Agardo que si, é un cabalo nado en casa así que aínda temos máis fe nel e sabemos que só lle fai falta experiencia. Saltou o seu primeiro gran premio de 4* aquí en Casas Novas o ano pasado, o seu primeiro 5* en Roma en setembro e en xaneiro xa gañou a súa primeira Copa do Mundo en Ámsterdam. Está a cumprir o que agardabamos del e é o que máis nos ten satisfeitos.
—Veremos a Donatello gañar en Casas Novas?
—Prefiro non facer prognósticos, imos intentar facelo o mellor posible. O cabalo está en boa forma e imos intentalo todo
—E en París 2024?
—Ese é o noso obxectivo número uno. Agardo estar aí e facelo o mellor posible nos Xogos Olímpicos.