O español convértese no segundo tenista máis novo finalista nos 37 anos de historia deste torneo
02 abr 2022 . Actualizado ás 17:54 h.O español Carlos Alcaraz impúxose este venres por 7-6(5) e 7-6(2) ao polaco Hubert Hurkacz, vixente campión, e clasificouse para a final do Masters 1.000 de Miami, na que pelexará este domingo polo título contra o noruegués Casper Ruud.
Alcaraz, número 16 do mundo, triunfou tras unha batalla de dúas horas e dous minutos ante Hurkacz, no primeiro enfrontamento entre ambos, e converteuse no segundo máis novo finalista nos 37 anos de historia do Aberto de Miami.
O mozo xogador español, de 18 anos e once meses, gañou o único precedente contra Ruud, que se remonta ao torneo de Marbella de 2021, cando se impuxo por 6-2 e 6-4, segundo recolle Efe. Con varias bandeiras de España nas bancadas e gran parte do público envorcado ao seu lado, asombrado polo nivel de tenis mostrado no torneo, Alcaraz atopouse cun partido moi tenso, como o dos cuartos de final, aínda que con puntos moito máis curtos.
Ambos os xogadores foron fortes co saque, limitando ao máximo os erros e agardando o momento adecuado para romper.
A primeira bóla de rotura foi no 4-3 a favor de Hurkacz, pero o español anulouna cunha fantástica deixada, un golpe cada vez máis decisivo no seu xogo e que fixo moito dano ao polaco. Tamén Alcaraz tivo dous a favor no 5-5, pero Hurkacz canceloullas cun tremendo saque gañador e unha dereita cruzada inalcanzable. O desempate foi a forma cruel, pero correcta de decidir o parcial.
Tal e como no desempate do terceiro set ante Kecmanovic, Alcaraz estivo abaixo 3-5, pero a súa reacción foi contundente, cunha gran resposta para recuperar a rotura de desvantaxe e un 7-5 que lle deu o primeiro parcial. Hurkacz fallou unha volea ao seu alcance no último punto e acabou lanzando a súa raqueta ao chan, consciente de que deixara escapar unha gran ocasión. E pagouna.
O segundo set seguiu un guion parecido, con Hurkacz que afrontou e salvou unha bóla de rotura e Alcaraz que anulou dúas co 5-5, o que abriu o camiño para un novo desempate.
Entre as moitas fortalezas do español está a personalidade. Non lle treme o brazo, non lle dá medo buscar golpes complicados nos momentos decisivos. Elementos que marcan a diferenza entre os grandes xogadores e os que «ten algo máis», como adoita dicir o extenista estadounidense Jim Courier, cando fala del.
No desempate da segunda manga, Alcaraz estivo intratable, escapouse 6-2 con outra maxistral deixada e sentenciou o encontro cun 7-2 que lle lanzou cara á final. levou as mans á cabeza para celebralo e dedicou o seu triunfo ao seu adestrador Juan Carlos Ferrero. «Vai por Juanki, esta vitoria é túa», escribiu na cámara a pé de campo que gravou outra actuación sobresaliente para un xogador que parece non ter teito.
É o segundo finalista máis novo de Miami e o quinto máis novo na historia dos 283 torneos Masters 1.000, desde 1990. Se gaña a final a Ruud converterase no máis novo campión na historia de Miami e no terceiro máis novo de sempre.
Sería, ademais, o primeiro español en conquistar Miami, despois de que Rafa Nadal perdese cinco finais e Sergi Bruguera, Carlos Moya e David Ferrer perdesen una cada un.