![](https://img.lavdg.com/sc/SjMjiMBOs7txaZ5uEkc3joAl8Cg=/480x/2022/03/31/00121648748342019775395/Foto/j31m2067.jpg)
O exxogador do Deportivo, que se atopaba sen equipo, poderá estar mañá no partido fronte ao Xirona
31 mar 2022 . Actualizado á 19:40 h.O dianteiro Adrián López, que se atopaba sen equipo, é novo xogador do Málaga para o que resta de tempada e estará dispoñible para o encontro de mañá ante o Xirona, informou este xoves o club malagueño.
O futbolista asturiano, de 34 anos, xa militou no Málaga na campaña 2008-2009 e estivo adestrando co conxunto malagueño durante varias semanas nun período de readaptación física e posta a punto por unha lesión muscular.
Adrián López formouse nas categorías inferiores do Oviedo e na tempada 2006-2007 comprometeuse co Deportivo, que o cedeu a varios equipos como o Alavés e o Málaga antes de volver á Coruña dúas tempadas e fichar polo Atlético de Madrid.
Cos colchoneiros, gañou a liga, Copa do Rey, Liga Europa e Supercopa de Europa, ademais de conseguir o subcampeonato da liga de Campións na campaña 2013-2014.
Despois de tres exitosas campañas no club branquivermello, xogou no Porto entre o 2014 e o 2019 e gañou a Supercopa portuguesa no 2018. Posteriormente, pasou polo Vilarreal e Osasuna, disputando en Primeira División 314 partidos e marcando 44 goles.