O seleccionador xermano non volverá contar con Müller, Boateng nin Hummels para profundar na renovación do combinado tras o desastre no Mundial de Rusia
06 mar 2019 . Actualizado á 09:34 h.Thomas Müller, Jérôme Boateng e Mats Hummels, tres campións do mundo no 2014 descartados dun só golpe, e unha nova xeración chamada a «asumir responsabilidades». O seleccionador alemán, Joachim Löw, acometeu este martes a gran limpeza, sete meses despois do desastre no Mundial de Rusia.
A tres semanas do primeiro partido de clasificación para a Eurocopa 2020, o adestrador da «Mannschaft», durante moito tempo criticado pola súa fidelidade sen fisuras aos xogadores históricos, acudiu este martes a Múnic para anunciar a súa caída en desgraza ás tres estrelas do Bayern. «Agradezo a Mats, Jérôme e Thomas todos estes anos extraordinarios de éxitos que pasamos xuntos», afirmou o seleccionador. «A decisión máis dura dos seus trece anos de mandato», comentou a prensa xermana.
A noticia debeu sorprender ao trío, que probablemente non agardaba ser descartado a dous anos da Eurocopa-2020. Müller, a pesar dos seus 100 partidos como internacional, só ten 29 anos. Hummels e Boateng (respectivamente 70 e 76 partidos) teñen 30 anos, unha idade propicia para exercer o liderado nun equipo.
Golpe de efecto
Os tres foron piares da grande Alemaña campioa do mundo no Brasil. Pero tamén participaron na catastrófica primeira fase do Mundial de Rusia 2018, saldada cunha prematura eliminación tras unha derrota contra Corea do Sur. O primeiro dos afectados en reaccionar foi Boateng. «Estou triste, porque para min representar o meu país sempre foi o máis grande», chouchiou o central, que sinalou que respecta a decisión do seleccionador.
«2019 é para o equipo de Alemaña o ano dun novo comezo», xustificouse Löw. «Queremos dar unha nova cara ao equipo. Estou convencido de que é a decisión correcta. Os mozos internacionais terán o espazo para desenvolverse por completo. A eles tócalles asumir a responsabilidade». Este golpe de efecto, que caeu como un raio en Alemaña, sorprende tendo en conta da traxectoria de Löw desde hai tempo. O técnico nunca se mostrou favorable aos cambios bruscos, e rexeitou prescindir das súas vellas estrelas tras o Mundial, invocando como un dogma «o indispensable equilibrio entre mocidade e experiencia».
Só resisten Neuer e Kroos
Máis aló de Mesut Özil, quen se retirou da selección despois dunha polémica ao redor das súas orixes turcas, o único «brasileiro» despedido despois do Mundial foi Sami Khedira. Boateng simplemente gozou de «descanso» nos dous últimos partidos de 2018. Dos campións do mundo no 2014 só quedan entre os seleccionables o porteiro do Bayern de Múnic Manuel Neuer e o centrocampista do Real Madrid Toni Kroos. E o propio Neuer xa non é intocable, pois Löw anunciou que «daría a súa oportunidade» este ano a Marc André Ter Stegen, gardameta do Barcelona. As estrelas alemás do mañá chámanse pois Timo Werner, Leroy Sané ou Serge Gnabry... Nas súas mans está agora agrandar o palmarés dunha selección con catro Mundiais no seu haber.