O manchego xogará no Vissel Kobe, propiedade de Rakuten, un dos principais patrocinadores do Barça
08 may 2018 . Actualizado á 07:40 h.Andrés Iniesta xogará as tres próximas tempadas no fútbol xaponés, e non no chinés, como anunciara nun principio a canle de televisión PPTV. Así o asegurou onte a Ser. O futbolista manchego, de 33 anos, comprometerase co Vissel Kobe ata o 2021, a razón de 25 millóns netos por tempada. Participou de forma directa na negociación Hiroshi Mikitani, propietario de Rakuten, un dos patrocinadores do Barcelona.
Iniesta recibirá no Xapón unha cifra moi similar á que lle ofrecía o Chongquin Dangdai Lifan chinés. Do mesmo xeito como se informou en relación co club chinés, a chegada do futbolista manchego ao Vissel Kobe comporta un acordo empresarial máis amplo, segundo o cal o club adquire parte da produción de viño das Adegas Iniesta, con sede en Fuentealbilla (Albacete). O Vissel Kobe é o equipo que elixiu Michael Laudrup para pechar a súa carreira deportiva.
Outros negocios
«Non iremos en contra da política de gastos da federación, nin imos a distorsionar o mercado chinés», indica o Chongquin Dangdai Lifan no comunicado no que desmente a fichaxe. No texto, deixa claro que o seu máximo accionista si ten negocios con Iniesta «na intermediación deportiva, mercadotecnia e educación xuvenil».