Carlos Sainz foi cuarto e conseguiu a súa mellor clasificación no campionato, mentres que Fernando Alonso quedou fóra tras unha accidentada saída
17 sep 2017 . Actualizado á 16:32 h.O piloto británico Lewis Hamilton (Mercedes) gañou o Gran Premio de Singapura no circuíto de Marina Bay, beneficiado polo accidente entre o holandés Max Verstappen (Red Bull) e o finlandés Kimi Raikkonen (Ferrari) que tamén deixou fóra ao alemán Sebastian Vettel (Ferrari). Tras unha saída moi accidentada, na que quedaron fose os dous Ferrari, Verstappen e Fernando Alonso (McLaren-Honda), Hamilton pasou do quinto lugar de saída ao primeiro e liderou a carreira ata o final seguido polo australiano Daniel Ricciardo (Red Bull) e o finlandés Valtteri Bottas (Mercedes), co español Carlos Sainz (Toro Rosso) cuarto.
Completaron os dez primeiros lugares o mexicano Sergio Pérez (Force India), o británico Jolyon Palmer (Renault), que sumou hoxe os seus primeiros puntos da tempada, o belga Stoffel Vandoorme (McLaren-Honda), o canadense Lance Stroll (Williams), o francés Romain Grosjean (Haas) e o francés Esteban Ocon (Force India). Foi a terceira vitoria consecutiva do líder do Mundial, Lewis Hamilton, tras as de Bélxica e Italia, e a sétima da tempada en catorce carreiras. Cos 25 puntos obtidos hoxe, o tricampión británico suma 263 e aumenta a súa distancia con Vettel a 28 tantos.
A carreira, marcada pola choiva inicial e os accidentes posteriores, concluíu con só 12 monoprazas en carreira (os dez primeiros seguidos polo brasileiro de Williams, Felipe Massa, e o alemán de Sauber, Pascal Wehrlein) e non completou as 65 voltas previstas, senón que foron 58 debido a que se superaron as 2 horas de duración máxima dun Gran Premio.