Asegurou que a sociedade a creou por recomendación do Manchester, o club no que xogaba con anterioridade
05 ago 2017 . Actualizado á 17:32 h.A estrela do Real Madrid Cristiano Ronaldo, imputado o luns por presunta fraude fiscal, dixo ante a xustiza que nunca tivo problemas co fisco en Inglaterra e que lle «gustaría volver», segundo a radio Cadena Ser, que tivo acceso á súa declaración. «Nunca tiven un problema en Inglaterra... por iso gustaríame volver a Inglaterra», dixo Ronaldo durante a súa declaración de hora e media nun xulgado de Pozuelo.
A fiscalía impútalle utilizar entre 2011 e 2014 unha estrutura de sociedades radicadas en Irlanda e nas Illas Virxes Británicas -onde as taxas impositivas son moi baixas-, «para ocultar as rendas xeradas en España polos dereitos de imaxe».
Nun comunicado, o xogador asegurou o luns que a estrutura investigada creouse en 2004, cando xogaba co Manchester United, moito antes de chegar ao club madrileño, en 2009. O dianteiro defendería en varias ocasións que as autoridades británicas controlaron esas sociedades e que non acharon ningunha irregularidade. Insistiu en que foron o propio Mánchester United e un avogado do club quen lle recomendou que abrise a sociedade en cuestión.
«Díxome Chris [Farnell] que era o que facían todos os futbolistas e eu non quería ser unha excepción». «Si quero ser excepción, sempre dentro do campo, pero fóra quero ser un máis», dixo na súa declaración.
Se Ronaldo fose condenado, enfrontaríase a «unha multa de polo menos 28 millóns de euros» e unha pena de ata tres anos e medio de cárcere, segundo o sindicato de técnicos do ministerio de Facenda español, Gestha.