O dianteiro colombiano chega cedido por unha tempada polo Mónaco
04 jul 2015 . Actualizado á 01:32 h.O Chelsea londiniense anunciou hoxe que chegou a un acordo co Mónaco para a incorporación do dianteiro colombiano Radamel Falcao, que a tempada pasada xa estivo cedido no Manchester United inglés. «Estou moi contento de incorporarme ao Chelsea e xa estou a desexar comezar os adestramentos e axudar ao equipo para reter o título de Liga e a conseguir éxitos en Europa», indicou Falcao nun comunicado na web do Chelsea.
Falcao, de 29 anos e que antes de fichar polo Mónaco brillou no Atlético de Madrid, xogou con anterioridade no River Plate arxentino e o Porto luso, co que debutou na liga de Campións precisamente ante o Chelsea, ao que anotou tres tantos na Supercopa de 2012.
O 'Tigre', que deixou o Atlético con destino Mónaco no verán de 2013, non puido acabar a tempada, posto que sufriu unha grave lesión en xaneiro de 2014 no seu xeonllo esquerdo, o que lle fixo perderse o resto da campaña e incluso o Mundial do Brasil.
En setembro incorporouse como cedido ao Manchester United e colaborou na volta do conxunto de Louis van Gaal á liga de Campións, aínda que non tivo continuidade no equipo titular. Iníciase agora outra etapa para Falcao ás ordes do técnico luso Jose Mourinho, en cuxo equipo coincidirá con outros exatléticos como o meta belga Thibaut Courtois, o brasileiro Filipe Luis e o atacante hispano-brasileiro Diego Costa, así como co tamén colombiano Juan Cuadrado.