Os equipos do Burela FS estrean a liga ante Inter Movistar e Atlético de Madrid
13 sep 2014 . Actualizado á 07:00 h.A competición na Primeira División masculina e feminina ábrese esta fin de semana con duelos de altura para os conxuntos do Burela-Pescados Rubén. O azar quixo que os dous empecen enfrontándose aos equipos que defenden título. As pupilas de Quico Otero mídense en Navalcarnero ao Atlético de Madrid (16 horas), mentres que os futbolistas preparados por Juanlu Alonso reciben ao Inter Movistar (Vista Alegre. 18 horas, G2).
O cadro masculino afronta a súa terceira tempada na elite coas miras máis baixas que o pasado curso. Despois da marcha de cinco futbolistas e a chegada de tan só tres, o obxectivo dos laranxas é moverse na zona tépeda da táboa e intentar clasificarse para a Copa de España e os play offs polo título.
Os de Juanlu Alonso teñen un inicio moi duro, ante Inter hoxe e a visita ao Palau Blaugrana a próxima semana, polo que o técnico considera que «estes partidos van servir para seguir afinando un pouco máis nosa posta a punta para a terceira xornada en Valencia», afirmou.
A pesar de que coñece a dificultade de sorprender ao actual campión de Liga, o madrileño asegurou que «iso non significa que non afrontemos o partido coa intención competir ben, dar un bo nivel e gañar», puntualizou.
Para poder derrotar ao Inter, Juanlu coñece a receita á perfección: «Temos que defender moi ben, porque se encaixamos máis de tres goles sabemos que non teremos ningunha posibilidade. Sérvenos de referencia o partido da pasada tempada, onde fixemos un bo encontro en defensa, pero encaixamos tres goles de estratexia e perdemos 4-5, porque nós non dispomos da súa mesma pegada».
Matamoros, que se perdeu o último encontro de pretemporada por precaución, xa estará hoxe ao seu máximo nivel. Nel están situadas as esperanzas de gol burelistas. «Mentres non estea dispoñible Chano, será a nosa principal referencia», lembrou.
Cambios nos madrileños
O Inter conserva o bloque do pasado curso, aínda que o Fútbol Club Barcelona arrebatoulle á brasileiro Batería, un dos seus referentes a última campaña. Tampouco continúan Tobe e Charanga, cedidos ao Baku United e ao Uruguai Tenerife, respectivamente; e Nano Modrego, fichado polo Zaragoza.
Para suplir estas baixas chegaron Lolo (Ribeira de Navarra), David Pazos (Santiago Futsal), Hamdaoui (ZVC Barza Temse de Bélxica) e o meta Pablo Turrado, que sobe desde o filial.
Entradas á venda
Unha hora antes do inicio do encontro poranse á venda nos despachos de billetes de Vista Alegre as últimas entradas para o choque. Ao ser declarado Día do Club, os socios maiores de 14 anos terán que pagar 5 euros e os menores desa idade, 1. Mentres, aqueles que non sexan socios abonarán 20 e 3 euros, respectivamente.