O axente de Diego Rivas, Javier Piquer, confirmou onte que o Deportivo está a negociar a incorporación do xogador da Real Sociedade, entidade coa que o mediocentro acaba contrato o próximo día 30.
«É un feito que Diego acaba contrato coa Real e estamos a ofrecer ao xogador, negociando, falando con varios equipos, entre eles o Dépor», apunta Piquer.
Aínda que primeiro di que non se pode dicir que o pivote estea «máis preto de A Coruña que doutros sitios», despois matiza que «hai boa predisposición polas dúas partes», en relación ao xogador e ao club branquiazul.
Levante e Betis, de Primeira, son outros dos equipos que se interesaron por Rivas, ao que non lle importaría xogar na categoría de prata: «O Dépor é un equipo de Primeira que por circunstancias está en Segundo», asegura Piquer. Rivas ten boas referencias do Dépor por Riki, que é amigo del e co que coincidiu no Xetafe.
Por outra banda, o diario luso A Bola recollía onte unhas declaracións de Guardado sobre o Sporting de Lisboa. «É un gran club de Portugal e claro que me gustaría ir ao Sporting», afirmou desde Estados Unidos.