O equipo Renault de fórmula 1 aceptou pagar unha «substanciosa indemnización» ao seu ex piloto Nelson Piquet júnior e ao pai deste, Nelson Piquet, ademais de abonar as costas xudiciais como consecuencia da demanda por libelo presentada por estes contra a escuadra polos incidentes do Gran Premio de Singapura do 2008. Piquet júnior recibiu naquela ocasión instrucións do equipo para que sufrise un accidente deliberado a fin de que o seu compañeiro, o español Fernando Alonso, conseguise a vitoria, como así sucedeu. Como consecuencia daquel caso, o director de Renault, o italiano Flavio Briatore, foi expulsado da F-1. O equipo Renault emitiu entón un comunicado no que acusaba a pai e fillo de mentir acerca das circunstancias que concorreron no caso e de intentar chantaxear aos responsables da escuadra. Os Piquet, indignados, recorreron aos tribunais.
Renault admite agora que aqueles comentarios foron incorrectos e aceptou correr cos gastos xudiciais así como indemnizar aos demandantes, despois de comprometerse a non repetir xamais comentarios semellantes.
O avogado de Piquet, Dominic Crossley, anunciou onte que Renault «pediu desculpas ante o tribunal por difamar aos seus dous clientes», pero non se dá por satisfeito. «Isto marca o comezo, máis que o final, do longo camiño que ambos emprenderon para corrixir moitas das irregularidades que ocorreron entón. Os dous foron ofendidos por Renault cando ameazaron con revelar o escándalo aos organismos responsables, e Nelsinho foi terriblemente tratado no seu curto paso pola fórmula 1», afirmou o avogado.
A escuadra presentou agora publicamente desculpas. «O 11 de setembro do 2009, Renault publicou un comunicado, repetido na nosa páxina web, no que suxerimos que Nelson Piquet júnior e o seu pai mentiran ao facer acusacións falsas de que membros do equipo e Nelson Piquet júnior prepararon un accidente deliberado no Gran Premio de Singapura 2008», recoñece a escuadra francesa. «Tamén suxerimos», engaden, «que estas mentiras foron inventadas para chantaxear ao equipo a fin de que Piquet júnior seguise pilotando o resto da tempada 2009».
Renault «acepta, como o fixo ante o Consello Mundial da Federación Internacional do Automóbil e foi confirmado por este o 21 de setembro do 2009, que as alegacións feitas por Nelson Piquet júnior non eran falsas, e que non as inventaron para chantaxear ao equipo».