Interlagos é un circuíto esixente para pilotos e motores no que gañaron o título os cinco últimos campións
04 nov 2010 . Actualizado á 03:23 h.Interlagos préstase ás coroacións. Aos dramas. E ao suspense. No circuíto brasileiro lograron o título os cinco últimos campións. Fernando Alonso, o único aspirante que matematicamente ten posibilidades de gañar o campionato na próxima carreira, insiste en que a batalla durará ata Abu Dabi, a última cita do gran circo no 2010. O asturiano non gañou nunca no Gran Premio do Brasil. Pero xa celebrou dous Mundiais en São Paulo.
O José Carlos Pace é un escenario vetusto, cun firme irregular que desafia a lóxica, e con historia. É variado, conta con distintos puntos propicios para o adiantamento, algo de agradecer nun calendario infestado de circuítos nos que superar a un rival é un milagre. Pero, sobre todo, ten sabor propio, é un trazado remodelado en diversas ocasións, recortado, reasfaltado e arroupado sempre por unha bancada vibrante que aínda soña cos ecos de Emerson Fittipaldi, Nelson Piquet e, sobre todo, Ayrton Senna. Se circuítos como Mónaco ofrecen unha contorna de encanto, Interlagos foi engulido polas vivendas e durante a carreira conviven a pouca distancia os Ferraris e as chabolas.
O autódromo brasileiro ten as súas luces e as súas sombras. Foi obxecto de severas críticas en anteriores edicións por deficiencias na súa organización e por problemas de seguridade. No 2000 os adestramentos tiveron que suspenderse porque caeran dentro da pista pancartas publicitarias. E con choiva torrencial, a auga chegou a formar arroios sobre o asfalto en máis dunha ocasión.
Quizais sexa o circuíto máis favorable para Ferrari de todas as citas do tramo final deste campionato. Está considerado de carga aerodinámica media, un factor que, en principio, lima a vantaxe de Red Bull.
As irregularidades do firme obrigan aos equipos para afinar cos axustes. E a carreira é esixente para o motor. Debido á altitude (800 metros sobre o nivel do mar), perde potencia. Ademais, necesita unha boa refrixeración debido ás temperaturas que se acadan na pista. Pero, ademais, os pilotos deberán afrontar a última parte, a máis rápida de Interlagos, a cen, pisando a fondo durante uns quince segundos, aproximadamente, todo un reto para os motores.
A versión de McLaren
Martin Whitmarsh, xefe de McLaren, destacou que Lewis Hamilton ten vantaxe sobre Alonso e Webber. Todos os aspirantes esgotaron os seus motores novos. Dispoñen de oito para todo o ano. Se necesitan recorrer a un extra, serán penalizados con dez postos na grella. Alonso e Webber teñen tres motores e cada un deles foi utilizado xa en dúas carreiras. Hamilton conta con dous motores que só foron usados nun gran premio e outros tres con dúas carreiras.
Tamén se trata dunha cita que espreme o físico dos pilotos, que deben coidar a hidratación por causa da calor e cuxos pescozos sofren por ter que correr en sentido contrario ao das agullas do reloxo.
Webber venceu o ano pasado. Pero Ferrari xa baixara os brazos para preparar o F10. A escuadra italiana gañara no 2006, o 2007 e o 2008. Felipe Massa venceu no 2006 e no 2008, cando Hamilton lle arrebatou o Mundial na última curva cun adiantamento a Glock in extremis. O brasileiro cedeulle no 2007 o triunfo a Raikkonen para que o nórdico se proclamase campión. Massa xa dixo que axudará a Alonso se é necesario. Whitmarsh xa pediu control sobre este tipo de manobras. Todos se vixían no escenario das coroacións.