O Día das Artes honra ao «creador sen límite» e «irrepetible» Isaac Díaz Pardo
CULTURA
Un acto en Santiago abriu un ano de actividades dedicadas ao intelectual
02 abr 2025 . Actualizado a las 09:34 h.«Figura transcendental da transformación das artes galegas no século XX», «empresario singular», «intelectual sempre comprometido coa súa terra», «creador sen límite», «unha das persoas máis modernas e de vangarda da nosa cultura», «recuperador da memoria», «figura inmensa e irrepetible»... Son só parte das expresións que se escoitaron no Teatro Principal compostelán para referirse a Isaac Díaz Pardo (Santiago, 1920-A Coruña, 2012) con motivo do acto institucional do Día das Artes Galegas que a Real Academia Galega de Belas Artes (Ragba) lle dedica nesta edición ao intelectual galeguista. Ademais, supón o inicio das actividades que ao longo dos próximos meses profundarán no seu legado con exposicións, conferencias e simposios.
Da laudatio á figura homenaxeada encargouse Xosé Díaz Arias de Castro, o seu fillo, no emotivo discurso Isaac Díaz Pardo ou as formas que xorden da memoria, nunha viaxe pola súa traxectoria vital e creativa. Así, no medio de tantos eloxios, Xosé Díaz lembrou que o seu pai sempre alardeaba de que a súa vida fora unha sucesións de «fracasos». Iso si, na súa intervención quedaron patentes os éxitos recoñecidos.
Fixo un percorrido desde esas primeiras experiencias na rúa das Hortas en Compostela, onde o pai de Díaz Pardo —Camilo Díaz Baliño— tiña o seu obradoiro de escenografía. «O neno Isaac criouse nun ambiente propicio, tanto ideolóxica como artisticamente, que condicionou a súa mirada do mundo e o papel que el mesmo xogaría máis adiante. Alí coñeceu a Ánxel Casal, Castelao, Luis Seoane, Arturo Cuadrado, Otero Pedrayo, Vicente Risco ou Asorey. Aprendeu co pai os segredos da pintura e o debuxo e as bases cívicas republicanas e galeguistas que o acompañaron durante toda a súa vida», relatou.
Non se esqueceu da súa participación, con só 15 anos, na produción dos carteis para o plebiscito do Estatuto de Autonomía ou do rexeitamento a facer un mural no Valle de los Caídos. Despois chegaría a fundación de Cerámicas do Castro, a marcha a Bos Aires, o reencontro con Seoane e a restauración da cerámica de Sargadelos ao seu regreso, destacando o Museo Galego de Arte Contemporánea Carlos Maside e a nova factoría de Sargadelos. «Foi quen de colocar as fábricas do Castro e Sargadelos na vangarda da produción cerámica española, introducindo o deseño industrial e rompendo co estancamento no que se atopaba a mediados do século XX», salientou o presidente da Ragba, Manuel Quintana Martelo.
O conselleiro de Cultura, José López Campos, afirmou que dedicarlle o Día das Artes Galegas a Isaac Díaz Pardo é o «xusto recoñecemento de Galicia ao innovador legado cultural dunha figura inmensa e irrepetible». A alcaldesa de Santiago, Goretti Sanmartín, lembrou o ir e vir apresurado do intelectual pola rúa Nova para acudir ao establecemento de Sargadelos. «Detrás da súa sinxela maneira de vivir, agochábase un ser brillante, diría que un xenio, un creador sen límite, un home de vangarda, capaz de idear os máis luminosos proxectos de país, de dar corpo á nosa identidade», proclamou nun acto que contou con amplo respaldo institucional e social.